المشكلة مش في التجارب نفسها قد ما في تجارب بتلعب في مسلمات مش محتاجة تجربة ، بمعنى انك مش عيب تجارب لاعب في مركز ما او توظيف ما ، بس ميبقاش ده على حساب خسارته في مركزه الأصلي اللي هو مركز إبداعه وPeak انتاجه الفني
يعني لو قررت تلعب 4-3-3 وتخلي هيكلك وسيستمك متمحور حواليها في كل مراحل اللعب ، لازم يكون محورين الوسط هما بالأساس لاعبان 8 يجيدان صناعة اللعب والزيادة Runner Midfield للعمق ، وفي نفس الوقت مميزين دفاعيا في كيفية غلق الممرات الداخلية Inner Corridor وكيفية مساندة الظهير في مواقف التفوق العددي على الأطراف ، لكن .. المفاجأة هو أننا شوفنا "النني" كمحور في 4-3-3 وده شئ مخالف لقدراته اللي بتقول انه يجيد المحور فقط في 4-2-3-1 ، لكن وجوده في 4-3-3 مقتصر فقط على اللعب في مركز 6 لأنه غير قادر على تقديم مردود يذكر في أدوار الممرات الجانبية ومش صاحب انطلاقات في التحولات
نفس المشكلة تباعاً مع "محمود تريزيجيه" العائد من اصابة طويلة ، انا معنديش مشكلة في انه عائد من اصابة طويلة خالص ما دام اللاعب جاهز ، لكن "تريزيجيه" بقاله 5 سنين بيلعب جناح صريح سواء كان جناح خط Outer Wing أو مائل للعمق Inverted ، مواقف استلامه للكرة في الممرات الجانبية والممر العميق Central Corridor من ساعة ما تم تصعيده من شباب الأهلي تكاد تعد على الأصابع , بالتالي اللعب بيه كمحور أيمن كانت فكرة كارثية لأنه غير ملم بأدوارها ومعندوش ما يكفي من الDefending Skill للعبها
نجمنا هداف البريميرليج "محمد صلاح" بقاله سنوات بيلعب في سيستم لعب بيعتمد عليه في مركز الجناح بشكل أساسي ... سيستم لعب اتخلق مخصوص عشان يخلق له مواقف تهديف صريحة لأنه ضمن أفضل 5 لاعبين في العالم حالياً في جودة الانهاء ، لكن هنا في مصر لسبب قررنا ان في مباريات التصفيات ان "صلاح" جناح Creator ممتاز وممكن نستغله في صناعة اللعب ونركن قدراته التهديفية على جنب ، وفي أمم إفريقيا نزيد الطين بلة ونشركه كمهاجم صريح وده عشان نريحه من أعباء الارتداد الدفاعي .. بالتالي نخسره في كل المواقف الهجومية تقريباً لدرجة انه أصبح خارج الجيم وأضاع هدف لو في البريميرليج هيخليه هدف ينافس في بوشكاش
المسلمات بتقول ان لو قلبين الدفاع بتوعي متواضعين في الخروج بالكرة ، يبقى لازم "ليبرو" وسطهم يسهل عملية التحضير Build Up Phase بحيث متلجأش للكرة الطويلة اللي بتعلن من خلالها عجزك التيكتيكي ، بالتالي فكرة اللعب بقلبين دفاع صراح في 4-3-3 بتتطلب قلبين Builders وده غير متوافق في الثنائي بتاعنا ، بالتالي لعبنا مليون كورة طويلة بدون كرة واحدة صحيحة ، طب لو مصر مفيهاش على بعض قلبين دفاع مميزين في التحضير .. ما تحط ليبرو أو على الأقل انزل بالارتكاز بينهم وقت التحضير CDM Drops Between Two Defenders
في حاجات لازم تتقال سريعاً
- لو هنكمل بطريقة 4-3-3 يبقى مينفعش "حمدي" و"النني" سوا ، احدهما فقط يشارك في مركز 6 والاخر هو بديله لأن الثنائي ميقدرش على دور المحور في الممرات الداخلية
- معانا 3 لاعبين يجيدوا اللعب كمحاور ( مهند - زيزو - إمام ) وعندهم الحد الأدنى من الإمكانيات المطلوبة للقيام بأدوار الممرات وهما اولى باللعب عن ان يتم التجربة بأحد غيرهم
- [size=78%]"صلاح" لازم يرجع مركزه (الجناح الأيمن) وبتوظيفه المعتاد كجناح Insider مستني الKey Pass عشان يروح للمرمى في موقف تهديفي[/size]
- لو طريقة 4-3-3 هتتغير متمناش البديل يبقى 4-2-3-1 تبقى البديل لأنها زي ما هتزود من تواجدنا الهجومي في مرحلتي الهجوم والتحول الهجومي فهي هتخسرنا 3 لاعيبة في مرحلتي الدفاع والارتداد ، لكن أفضل طريقة 3-4-3 اللي عناصرها جاهزة وموجودة حتى مع خسارة "أكرم" و"فتوح" ، فنقدر نستغل "زيزو" و"أيمن أشرف" او "مروان داوود" Wing Backs ، وهنا هنقدر نستفيد بشكل أفضل من "النني" كمحور مزدوج مع زميله Double Pivot ، وهنا "صلاح" هيقدر يمارس دوره المزدوج بين الجناح الInsider والجناح الCreator
- انت مطالب برد فعل في المباريات القادمة ، مش بس مجرد فوز ده لازم نشوف شكل مختلف خالص يدي ولو 1%.
آخر حاجة ، كأس العرب كانت تنفع حقل تجارب انك تجرب عناصر وتوظيفات عديدة ، لكن كأس الأمم معترك دولي وأهم بطولة قارية في إفريقيا .. حتى لو فرضنا أن الإتحاد المصري ارتكب جريمة واتفق مع "كيروش" انه يودينا مونديال ويستخدم كأس العرب وكأس الأمم كتحضيرات وهي جريمة لا تغتغر ، فلا برضو انت مطالب تقدم وجه تنافسي وتنافس على الفوز بالبطولة لأن ده المعتاد مننا.
كتبها: Mohamed Alaa
