أصل جيل المعلم "حسن شحاته" كسب إفريقيا بالمحليين
جملة بيرددها أي حد تقوله إن مصر مفيهاش كواليتي ومش قادر يواجه الواقع زي باقي البشر ان كواليتي المحليين حالياً تكفيه للتفوق على أمثال المستوى الثالث في افريقيا فقط ، لكن بالكاد يمكنه مواجهة أصحاب المستوى الأول والثاني.
طب اشمعنا صحيح جيل "حسن شحاته" اللي كان فيه 8 محترفين طوال فترته في البطولات الثلاث قدر يحقق أمم إفريقيا 3 مرات ، وقصاد اسكوادات متقفلة محترفين وفيها "دروجبا" و"ايتو" و"يايا توريه" واسمواه جيان" ؟ عارفين ليه ؟
لأن دي حالة استثنائية يا شباب ، فجأة في مصر في 2005 بقا عندنا جيل كامل من المواهب في كل المراكز ، لدرجة اننا لعبنا 3 نسخ أمم إفريقيا بـ3 باكات شمال مختلفين وكلهم كانوا ممتازين ، لدرجة ان كان في منتخبنا 8 مهاجمين منهم أسطورة مصر في التسعينات ، ولدرجة ان كان معانا أفضل صانع العاب في القارة وأفضل لاعب وسط في القارة وأفضل Defender داخل القارة وأفضل مدافع في القارة وأفضل حارس في القارة ، جيل منتخب "حسن شحاته" كام بالكامل يستحق اللعب في مصاف أندية اوروبا الكبرى مستريح وجودتهم كانت تسمح بده جداً.
عشان كده ده جيل استثنائي وظروفه مش هتتكرر تاني لانها عكس الواقع المرير ، الواقع اللي بيقول ان مصر مفيهاش تأسيس مواهب ولا بيئة مناسبة من أجل البناء الصحيح للاعب كرة قدم ، وان منتخبات القارة عرفت الفولة وسابتلك بطولات الاندية في القارة تقرقش فيها براحتك ، وراحت هي سربت مواهبها على أوروبا بدري بدري ، النتيجة الطبيعية هي ان هتشوف منتخبات كتير قوامها الأساسي مش بس بيتكون من محترفين ، ده المحترفين نجوم فرقهم الأوروبية كمان وبيترشحوا لجوائز لاعبي الشهر والاسبوع في دورياتهم.
فلو لسه مقتنع ان مصر تقدر تكسب أمم إفريقيا بالمحليين أو إن إحنا أساسا جودتنا المحلية الحالية هتخليك تجابه المنتخبات دي .. Be My Guest .. هات المدرب اللي تختاره وحاول بنفس المجموعة تكسب البطولة.
المشكلة مش بس مشكلة مدرب .. من بكرة "كيروش" ممكن يركب قطر ستة إلا تلت وتنساه عادي جدا وتجيب مكانه أي مدرب تتمناه .. وقتها برضو هتتأكد ان مفيش تغيير جذري حصل لأن المشكلة مش بس اللي ماسك الدفة قد ما أدواته هي كمان محدودة الحيلة والقدرة ونفسها مش طويل بشكل عام..
كتب: Mohamed Alaa
