انا عمري ٣٨ سنه مخطوبة من ٣ شهور لشخص عمره ٤٦ سنه احنا الاتنين لم يسبق لينا الزواج، عايزة اخد رايكم اكمل معاه ولا لأ، لاني محتارة في موضوعي، وياريت لو حد مر بنفس ظروفي يقولي من تجربته.
اولا هو شخص كويس مستوي علمي واجتماعي ومادي اعلي مني، دا الي واضح لغاية الوقت، هو من محافظة غير محافظتي وهسكن هناك معاه، انا الحمدلله بشهادة الناس جميلة ودمي خفيف وشيك ومحترمة ومش باين عليا سن بيدوني ٢٥ سنه لاني مهتمه بوزني ومظهري.
مشكلتي معاه في ٣ حاجات
١ - انسان بارد جدا ممكن يقعد بالاسبوعين ميكلمنيش فون.
يتكلم واتس بس وكلامه معايا قليل ميبينش شخصيته مع انه وظيفة كبيرة ومحترمة ومش هايف، انا شكيت الاول انه بخيل وبيخاف على رصيده مثلا فبقيت انا اتصل لاقيته مش بيرد عليا كمان.
جاف جدا، لو قولتله تعبانه مثلا ميسالش عليا خالص ولا مالك ولا سلامتك ولا يهتم، ويوم ما يسأل بيقول بالعافية كانه واجب وعايز يخلص منه، وكذلك لو قولت متضايقة ولا مخنوقة عمره ما يقولي من ايه ولا اي كلمه كويسه، مع ان انا عكسه تماما، بسال وبهتم جدا وبشاركه كل مشاكله وادور علي حلول، لو تعبان افضل اسال لغاية ما يبقي بخير.
ممكن طول النهار علي كلمتين ازيك واهلك عاملين ايه، وانا ارد بنفس الكلام وخلاص، حاولت افتح مواضيع واهزر يزعل، اساله يرد بالعافيه، زهقت وبطلت اتكلم وبقيت ارد عليه وخلاص، بس مخنوقه ومش حاسه بأن فيه حد في حياتي.
اول الخطوبة كان الى حد ما كويس وكنا لسه بنتعرف فطبعا مقيمتش الحتة دي فيه، واصلا قولت بعد كده لما نعرف بعض الوضع هيتحسن لكن للاسف الوضع بقي اسوأ.
حتي الزيارات جالي يادوب ٣ مرات بالعافيه.
٢- هو والده ووالدته منفصلين من صغره، واتربي مع اهل والده، لما كبر استقل وكان عايش في شقه لوحده، وبعد الخطوبة لقيته جاب والده يعيش معاه في نفس الشقة لانه تعبان عنده القلب ومحتاج حد يخدمه، فتوقعت انه بعد الجواز هيجيبه يعيش معانا في نفس الشقة خصوصا انه ملوش غيره اولاد تاني، هو الحقيقة مقاليش كده لغاية الوقت بس كل الظواهر بتقول كده ومره كان خارج بساله والدك هيقعد ازاي لوحده لاقيته بيقولي لو كنتي هنا كنت اطمنت.
طيب انا كل المشاكل اللي بشوفها هنا وفي اي مكان ان بيت العيلة بيعمل مشاكل اومال لما نبقي كلنا في نفس الشقه الوضع هيبقي ايه وحاخد راحتي وخصوصيتي ازاي.
لو قولتله نبقي في شقتين منفصلين ونراعي والدك اكيد مش هيرضي لانه حركته بقت تقيله واكيد هيقولي لازم يبقي تحت عيني.. انا بس مش عايزة مشاكل وعايزة اخد راحتي زي اي بني ادمه بتستقل في بيتها وعايزة بعد العمر دا استقر وافرح واجيب اطفال اربيهم في هدوء.
وكمان لا هو ولا اهله قالو ان والده هيسكن معانا لما كان متقدملي.
٣- الغربة، لان انا اتربيت في بيت مبعدتش عن اهلي ليلة ولا سافرت بره محافظتي، وفجأة ابعد لمحافظة تانية اسمع ان اهلها صعبين وجافيين ومليش فيها حد ولا عمري روحتها، بس للاسف بسبب كبر سني مبقاش حد يتقدم بقالي سنين واللي بيتقدم مش مناسب وطبعا زي اي اهل نفسهم يفرحو بيا ويشوفو ولادي فشجعوني اوافق مع اني كنت رافضة الغربة، خصوصا امي عاشت نفس الظروف وعانت ومازلت بتعاني.
يا جماعة الانسان دا مناسب ليا ولا لاء؟ فيه ناس بتقولي عادي ودا طبع، فهل ممكن يتغير ويبقي بني ادم حنين شوية ولا لاء وبعد الجواز الوضع هيبقي اسوء ؟
انا مبقيتش حاسة بوجوده خالص وكاني لسه مش مخطوبة من قلة اهتمامه وحنيته، مع العلم انا ملتزمة يا جماعة مش عايزة كلام خارج ولا حب طول النهار، بس المعقول يعني بردو عشان على الاقل احس بوجوده في حياتي، انا بقيت حاسة بصراحة انه بيتجوز بس عشان يجيب ابوه يستقر معاه ويجيبله واحده تخدمه.. انا طول الوقت حزينه ومكسورة ولما اهلي يجبولي سيرة الجهاز بتعصب ووشي بيتقلب وساعات اعيط، هما نفسهم بقوا يتخانقوا معايا بسبب زعلي ده.
هما مش عارفين انا مش فرحانه ليه ولا حكيتلهم علي معاملته الي كاسراني دي بسكت واكتم في نفسي.
انا ليا اخت اصغر مني بعشر سنين مخطوبة بقالها سنتين والحمدلله خطيبها رغم انه ظروفه وحشة جدا ومتغرب الا انه بيعاملها كويس جدا ومغرقها هدايا ومكالمات ومفاجأت ربنا يباركلهم يارب.
انا مش عايزة هدايا ولا اي حاجة انا بس كان نفسي في كلمة كويسة او معاملة تجبر خاطري بعد صبري كل السنين دي.
اعمل ايه اكمل عشان عمري الي جري ولا استني يمكن يجي حد يعاملني كويس.
