انا دلوقتي متجوزه شخص كان كويس جدا في الخطوبه وبيشتغل، عرفتو وهوا مبطل مخدرات بقاله سنين وكان حد ناجح جدا، واتجوزته، وبعد الجواز رجع تاني للادمان، وهوا كويس معايا وبيحبني وانا بحبو جدا وحنين وعمره مكان قليل الادب معايا.
كنت حاطه وسيله وربنا اراد بردو وحملت، راح اتعالج وانا حامل وبقى كويس جدا فترة واشتغل ورجع تاني، حياتي كانت صعبه، كل الفلوس راحت على الإدمان، وطبعا بيكدب وبيعمل بلاوي وهوا اصلا مش كده.
دلوقتي راح يتعالج وانا مخبيه على اهلي أنه راح يتعالج تاني عشان هيطلقوني منه ويدوله ابني، انا حاسه اني تايهه، هوا انا لازم اسيبه ولا اعمل ايه ؟
للاسف مبشتغلش واهلي مش هينفع اعيش معاهم لو انفصلت، وشقتي ايجار، اهله محترمين وواقفين جمبه بيدفعولو العلاج وبيدوني فلوس على القد جدا مش مكفيه البيت، وانا مستحمله عشان بحبه.
بس حاسه طاقتي خلصت، ولو اتصل بيا مش هقدر اكلمه، حاسه أنه ظلمني واهلي متضايقين مني ان دي حياتي، اعمل ايه ؟
هوا انا غلطت عشان مستحملاه وبحبه ؟ وكل ده اصلا على الفاضي ولا ممكن يتغير فعلا ؟
