على أيام الطفولة، أذكر فيلم كرتون عن واحد قصير ما يبتسم ولا يتكلم لكنه مرسم طول الوقت وشايل شنطة، ودوره الوحيد انه ينشب لبطل الفيلم ويطلع له في كل مكان مهما حاول يتخلص منه، إلين في الاخير يحطه في صندوق ويرمي في بحر وقرر ينحاش منه بالسفر إلى أبعد مكان في العالم ويوم وصل لقاه منتظره هناك!
في ناس كذا.. عندهم ثقالة دم ومتخرجين بتفوق من معهد السماجة العالي، ويجيك الواحد منهم متخصص اسئلة ماتدري وش تبي عن اشياء ماله أي دخل فيها، والمشكلة الى حد هنا مع نفسه لكن البلا لما يكون حظك متزاعل معك ويخليك تقابل هالبني ادم بالصدفة وين مارحت، تقول متحلف لك، تروح مناسبة عامة تلقاه، تروح تزور خويك تلقاه، تروح مباراة تلقاه، تمسك سرا في بنك تلاقيه في الدور اللي وراك مباشرة، انا ماعندي مشكلة يستنسخ نفسه، الشي الوحيد اللي ابي اعرفه هو كيف يدري عن هالمواعيد كلها، والا يعني الحكمة انقلبت وصارت الف صدفة واحنا اللي قعدنا بها، ياعمي لو تسوي انت عزيمة خاصة ماحد يطبها غير المقربين بس، تلاقيه طابها قبلهم وجالس يحتريهم!.. ووقتها بتشوفه قدامك وتستغرب وش جايبه هذا الحين؟ المفروض يكون في المقهى.. تخطف رجولك سريع ع المقهى عشان تتأكد.. بتلاقيه موجود هناك بعد!
ألف صدفة بدون ميعاد! بقلم أبو العريف
