المحرر موضوع: لا تقول لأحد!  (زيارة 28 مرات)

إنسان حر

  • Hero Member
  • *****
  • مشاركة: 654
    • مشاهدة الملف الشخصي

لا تقول لأحد!

« في: آب 14, 2022, 10:50:57 صباحاً »
يعجبك الانسان اللي يحب يحافظ على خصوصية الناس، صحيح انه ما يخلي احد في حاله ومستعد يتحول لمحرك بحث لو تسأله عن أي سالفة تخص أي بني آدم، وصحيح انه يستمتع وهو يكب عفش أي شي يتعلق بحياة أي واحد من الناس لأكبر مجموعة منهم.. لكن ياجماعة ما لها داعي نظلمه.. الرجال ما يدلي بأي معلومة الا بعد مايقول «أمانة لا تقول احد!»

طيب كيف مايدري احد يالحبيب وانت قايل السالفة لكل اللي تعرفهم تقريبا وبمعدل خمس مرات للواحد فيهم، هذا غير شغل البهارات والنكهة اللي تحطها حضرتك على الموضوع، مرة تقلبه دراما.. ومرة تسوي نفسك حكيم.. ومرة تلعب دور كونان وعلى بالك قافط كل شي ماشا الله عليك.. وفي كل الاحوال تبقى آخر واحد يصلح خوي، وأسوأ شخص ممكن يقدم خدمة الفضفضة المجانية!

لا ويجيك اللي زي هذا وش زينه لاتكلم وساق عليك دور الحريص على مصلحتك، وانه ماقال لك هالشي الا وانت غالي عنده، وطبعا بيصجك كل شوي بالعلوم الغانمة اللي يسبقها كل شوي بجمل من نوع «ترا هالكلام ماقلته لاحد قبلك» و«بس ترا بيني وبينك».. تدرون عاد انا بديت اشك صراحة في جملة «سرك في بير» لأن الاخ هذا شكله مسنتر عند هالبير ومنزل له حبل في آخره سطل وشغال غرف وتوزيع.

اقتباس
مقال: لا تقول لأحد! -- بقلم أبو العريف