بشركم أخيرا عرفت وش معنى «خدم لزم».. صراحة كانت محيراني ورحت قلبت في هالقواميس وشغلت موهبتي البحثية وقلت يا ولد يبغى لك تحرر هالمصطلح على قولة ربع المقهى.. فكرت فيها شوي وقلت شكلها يقول انها «يلزم خدمة» بس مسوية حادث وراحت الوجهية والعكوس عشان كذا جت مقلوبة وكنها لوحات سيارة..
لكن هالتفسير موب لازم صحيح يعني شكله اللي اخترع الكلمة حب يمشيها قافية وبس.. وطقت في راسه اشمعنى المسلسلات مزعجيننا خدم حشم، خلنا حنا بعد نقول «خدم لزم» وتصير هي قافية وقفلة في نفس الوقت لأي لقاء مع أي شخص خصوصا ان إيقاعها بطل وتحس فيه مهايط انك راعي فزعة.. ماهوب زي الكلمات الرقيقة اللي تستخدم في نفس الموضع من نوع «تامرني بشي؟» واخواتها.. ولو انك لازم تراعي احيانا طبيعة الطرف الثاني عشان تختار القفلة المناسبة معاه. المهم نرجع للاكتشاف العبقري.. خدم لزم يا طويلين العمر..ما جت بهالترتيب من فراغ.. لان معناها الحقيقي.. تخدمني لازم اخدمك.. وممكن استعمالها من الناحية الثانية.. اخدمك لازم تخدمني.. المهم ان المجتمع كله عقب هالكلمة بيصير «يخدم» بعضه.. و «ملتزم» بهالشي.. وجرب تكون بايع نفسك ويساعدك أحد بشي ويجيك عقبها ولا تساعده.. أنا اعرف واحد إذا قدم خدمة لاحد يروح يخترع أي سالفة بس عشان هذاك يردها له.. ما في شي بدون مقابل يا حبيبي.. خدم لزم إز بزنس!
خدم لزم؟ -- بقلم أبو العريف
