قبل كم مر
اليوم الوطني السعودي الله يعيده علينا بالصحة والعافية، ومن حقنا نفرح فيه زي كل دول العالم الباقية، بس بعض شبابنا الله يهديهم يخلون الواحد يندم انه عطاهم فرصة ياخذون راحتهم ، فاهمين ان الفرح لازم يكون فوضى وعربجة وازعاج، وبعضهم لازم يتميلح لاشاف فيه حريم، يعني ممكن يعدم سيارته وينزل منها ويقوم يدقدق كورة بنص الشارع ومعطل الشارع بس عشان يعجب البنت اللي في سيارة صالون وراه، ما يدري انها بقلبها تقول الحمدلله على العقل الله يشفيك ويخلف على اهلك، ليش هالتصرفات الزاحفة، ليش نقفل الشوارع ونؤذي خلق الله ونخلي الدوريات تطارد ورانا، الفوضى اللي يسويها بعض شبابنا راح ترسم صورة ماهي زينة ابد عن بلدنا، عاد هالايام لو تعطس تلاقي نفسك مصور ونازل لك فيديو على الانترنت، ليش ما يفكر أي شاب يحرق شجره او يقلب سطل قمامة «تكرمون» ان فيه واحد قاعد يصوره وكلها كم يوم ينسحب مع خشمه، وش دخل التفحيط او الرقص والشارع واقف بيومنا الوطني، المرور كان المفروض ينشر عقوبات قبل بداية أي احتفال باللي يوقفون الشوارع ، يعلمون الشباب ان فيه عقوبات صارمة عشان الناس تقضب القاع وتهجد، بدون عقوبات صارمة لا تحلمون ان أي وضع ينضبط، تبون تاجر او حرامي او مدرس او طبيب او شاب يفحط او عاطل يدربي راسه ما راح ينضبطون الا اذا حطيتوا عقوبات صارمة!
وش اللي يخلينا نستلج باليوم الوطني؟! -- بقلم أبو العريف
وهنا تقرأ: كلام عن اليوم الوطني السعودي.. مؤثر
