يا لطيف لو واحد منكم سوى حاله ذهين وقام يطقطق بالحسابات والارقام في مجتمعنا، وخصوصا بالامور اللي تخص الصحة، زي مرضى السكر، ومرضى الضغط، ومرضى النقرس والقلب، الله لا يضر مسلم، كان تطلع له ارقام تخلي شعر راسه يوقف، والاصلع تخلي اذانه تفتر كنها الصحن الدوار يوم يرميه قرانديزر على بيقا بيقا، ادري انكم عارفين البير وغطاه، وتدرون ان ما فيه ارقام تجمد على الشارب، ما فيه ارقام صحيحة تقدر تقول إن اللي سواها تعب شوي عليها، يعني اي رقم يطلع لكم عن عدد مرضى السكر، والا الضغط والا اي شي عاد انتوا سوو حالكم فاهمين واضربوا العدد بالرقم اللي يطري في بالكم، ليش لأن الامور اكثرها عندنا شختك بختك، زي ما تجي تجي، الحين جب ورقة وقلم وقل ابي اكتب بحث عن مجتمعنا، حط الارقام اللي تبي، صدقني ما حد يقدر يعارضك لأن ما فيه شي ثابت ومبين، ما لنا بكثر الهرج واللت والعجن، الدولة تخسر المليارات في علاجات مرضى السكر والضغط وغيرها من الامراض اللي باذن الله لو حسبنا حسابها من عشر سنين واكثر كان ما صار اللي صار، يعلمني دكتور مهم في هالسوالف (عشان تعرفون اني واسطة)، يقول ان مجتمعنا كان بإمكانه توفير المليارات من الخساير في صرف العلاجات لو كان فيه أحد عنده شوي مخ، يقول لو بس حطينا حول كل مدرسة أو حول كل مسجد او حول كل حديقة بالحواري ممشى للناس، كان مرضى السكر والضغط نزل عددهم لأكثر من النصف، بس وين اللي يفكر للمستقبل يا حسرة قلبي!
وين اللي يفكر ؟! -- بقلم أبو العريف
