كويس انه يكون فيه دراسة، لا سمعت اسم دراسة تستانس تحس اننا ماشين باذن الله على الطريق الصحيح، بس عاد اشوف نص الدراسات حقتنا كنها توقعات من الباحث ما تحس انها شي ما يخر الماء، الدراسة اللي راح نسولف عنها اليوم تبشر بالخير وتعتبر اول الخطوات الزينة، خصوصا اننا صرنا مشتاقين للدراسات الزينة، مشتاقين لأي دراسة وراها سنع، دراستنا اليوم تقول ان بناتنا المطلقات السنة اللي مضت وصل عددهن لثمانطعش الف مطلقة، يعني ثلاثين بالمية من بناتنا مطلقات، ولا قالت الدراسة وش الاسباب اللي خلت المطلقات يوصلن لهالعدد الكبير واللي يخوف، طيب هذا دارس جزاه الله خير تعب وراكض وسوى لك دراسة، لازم فيه دارسين ثانين يتولون البحث في المشكلات والاسباب واعطاء حلول، وش الاسباب اللي خلت الواحد يطلق زي براد ابو ربع، يطلق وهو يقرا جريدة، يطلق بمسج جوال، وش يخلي بناتنا يسوون حفلات طلاق اكبر من حفلات الزواج اول مايستلمن ورقتهن، ما دام الدعوة كلها حملات في حملات، ليش ما نسوي حملة توعية عن اضرار
الطلاق ونصايح للزوجين، شدوا حيلكم ترى الوضع مدحدر، خلونا من سوالف الزبرقة وتحركوا، الطلاق صار خطير زيه زي مرض السكر، يحتاج موازنة وجمعيات حقيقية تشتغل صدق مو مهايط.
ما يحتاج دراسة -- بقلم أبو العريف
