الناس هاليومين ما عاد عندهم تحمل، صار صبر الواحد قليل، والكل يحس بغلقه ما يدري وش سببها، الحرمة ام البزارين ماكله حالها بحالها وكل خوفها انها ترمي بعد ما تضيع سنين عمرها مع زوجها «كله من مسلسلات زوارة خميس وطقتها»، الحريم حاطات اذانهم عند التلفزيون وكل ما شافن المسلسلات يخافن ان هاللي صار في المسلسل يصير لهن، لا جيت تبي تنام، والا زوجتك وارمة خشتها، من خلاها بخلاها، كن جايها خبر انك متزوج عليها، وتقوم تحلطم وتسب بالرجال وان ما لهم خاتمة، وان الرجاجيل ياخذون الحريم لحم ويذبونهن عظم، وان الرجاجيل ما يستاهلون ان الزوجة تبيع عمرها عشانهم، ومن هالكلام اللي يسم البدن، وبالاخير تكتشف ان السبب ورى هالحلطمة واللطم والولولة بسبب مسلسل زوارة خميس وطقتهم، تناقشك كنها هي سعاد عبدالله وانت المنصور، الحريم بعضهن صايرات عقولهن اصغر من عقول البزارين، كل ما شافت لها لقطة بمسلسل، تحس انها هي المقصودة بسوالف وخرابيط هالافلام، والمشكلة الحريم ينوحون ويصيحون من كثر
الطلاق والعنوسة ومستغربات ليش الاجنبية لا تزوجت سعودي ما تطلق مهما صار، صح ان الرجاجيل عندنا فيهم حقهم من الحقانة وقلة السنع، بس بصراحة الحريم زودوها شوي، تبي زوج على كيفها وحسب ظروفها، ما تشوف الاجنبية لا تزوجت سعودي وش تسوي له من طاعة وخدمة، بناتنا الله يصلح حالهن يحتاجن كثير من دروس ودورات في المعاملة الزوجية!
كنها سعاد عبدالله! -- بقلم أبو العريف
