أتوقع لو ترفع حجرة طلعت لك قناة فضائية تهذر، كل قناة تخاطب الناس وكن ما فيه غيرها، طبيعي هالشي لأن أكثرهم يملكونها أشخاص، وياشين الشخص لاصار مو عارف وش يسوي وحط له قناة فضائية ماعاد أحد يقدر يحاكيه، يقوم يسولف نيابة الاتحاد العالمي للاعلام وحنا عاد الفرد منا بدون مايكون صاحب قناة فضائية صاجنا بسوالفه وبطولاته ومعلوماته اللي كن ما حد يعرفها غيره، ولا يدبل كبدك غير اللي كل ساعة ساعتين يعيد سالفته، وكل ما دخل ضيف جديد قطع اي سالفة وقام يقص سالفته على الرجال الجديد حتى لو ما يعرفه، وسالفة إعادة حكي السوالف كل دقيقة موضوع يخليك تمل من الجلسة وياويلك لو حاولت تنصح هالآدمي، راح ينقلب عليك ويقوم يجيب سوالف بقل المروة والوفاء ويقلبها لك مضارب البادية وانت مو فاضي، نرجع لموضوع القنوات الفضائية، ما تدرون اننا حنا يالعرب نملك 600 قناة فضائية تهذر على روسنا يوميا، ولو تبي قناة عليها القيمة يمكن ما تطلع الا بقناتين أو ثلاث، لاجاء رمضان الكريم استلمونا واشغلونا بحياة الفهد وزميلاتها، قلبوا روسنا بدموع حياة الفهد، واتحدى اذا شفت حلقة ما تبكي فيها، الغريب انهم ما لهم عذر يقدمون شي زين، تقول الاحصائيات «امحق» بان مبالغ الاعلانات في رمضان الكريم حوالي خمسة مليار دولار عدا ونقدا تدخل تجوري القنوات الفضائية، ياساتر كل هالمبلغ وقنواتنا العربية ما يقدمون الا اعمال من طقة ابو ريالين!
قنوات ابو ريالين ! -- بقلم أبو العريف
