أمس بثت الوكالات الإخبارية (أموت على الفصحى أنا.. يا عيني على بثت)، بثت خبر مدري هو ملفق والا صحيح يمكن تقرونه اليوم بكل الجرايد، لأن جرايدنا الله يوفقهم كنهم وجوه أهل الصين ما تفرق جريدة من الثانية غير بالاسم والا أخبارهم تشابه وشغالين كوبي بيست من الوكالات، بالله يا قراء جعلني ماعدمكم ما دام الخبر راح ينشر اليوم شوفوا كم جريدة ناشرته، عشان تعرفون أن أبو العريف مو سهل لا نوى يشغل مخه (بس عاد متى يشغله الله يصلحه)، يقول الخبر إن الصين اخترعوا حبوب (لا يفرحون الدشير يتوقعون أنها حبوب ابو ملف)، لا حبوب لا بلعها الواحد تقوى ذاكرته، والحقيقة يا إخوان أنها بشرى من رب العالمين لواحد مثلي، تصدقون اني طمرت من الفرحة كن المنتخب السعودي رجع مرة ثانية وفاز على البحرين وتأهل لكأس العالم (ايه هين)، وعلى طاري كأس العالم ودنا نبارك لإخواننا المصريين ولمدربهم شحاتة اللي فرض على العالم احترامه ولا جته التشكيلة مطبوعة وهو ما له إلا أنه يختار من هالورقة لاعبين يطببهم بالمباراة، وإذا قال بم الغوا عقده ربعنا، فكونا من السوالف اللي تمغص البطن وتغث الخاطر وخلونا نرجع لموضوع الحبوب اللي تقوي الذاكرة وهذي الحبوب تراها حبوب مصنوعة للمفهين، الفهاوة في مقدمة ابن خلدون (لا أحد يصدق) مرض مستعصي يصيب عصيبات التسليكات اللي داير ما يدور لاصقة بجدار المخ من فوق (الله ياخذ اللي علمك تشرح)، من تلهط الحبوب تشتغل هالتسلكيات وتقوم تنقل الكهرب حق الذهانة، عشان كذا يقولون الناس للي ينقدون عليه: فلان فاصل! مو فاصل إعلاني، فاصل سلك في مخه!
المفهين! -- بقلم أبو العريف
