المحرر موضوع: خناقة ضرب بين زوجة وزوجها؛ ترجعله ولا تطلق؟  (زيارة 32 مرات)

محتار

  • Full Member
  • ***
  • مشاركة: 244
    • مشاهدة الملف الشخصي

خناقة ضرب بين زوجة وزوجها؛ ترجعله ولا تطلق؟

« في: أيار 10, 2021, 07:28:14 مسائاً »
انا متزوجة من ١٤ سنة، وخلفت بعد ٧ سنين بعمليات حقن مجهري، زوجي مبيخلفش طبيعي، وصبرت وربنا كرمنا وكنت بدفع معاه تكاليف العمليات النص بالنص واكتر، وبساعد في مصاريف البيت وطلبات أولادي وطلباتي؛ لبس ودروس خصوصي وحضانات وهو بيعطيني مصاريف البيت فقط، ولما تخلص بكمل من معايا لحد ما يقبض.. وعادة بيستلف مني فلوس لما فلوسه تخلص واخر الشهر يعطيني اللي استلفه.

ومن اسبوعين كنت راجعة من الشغل وهلكانه صيام وحر.. وجيبت معايا سمك بوري مشوي للفطار لاني مش هلحق اطبخ.. وهو كان عنده شغل العصر وهياخد معاه الفطار من البيت. رجعت البيت قعدت مع الولاد في الصالة الاعبهم واضحكهم لأنهم بيوحشوني جدا، هم حياتي اغلى عندي من نفسي، وخصوصًا انهم جولي بعد تعب وصبر سنين..

هو كان نايم وصحي وسألني هو انا عليا ليكي كام قولتله كذا، قالي دانتي مزوده في الفلوس، قولتله ابدا انا مسجله على الموبيل إللى انتا اخدته اهوه ودي فلوس ناس مش فلوسي ولازم ارجعهالهم.

وكان عايز فلوس تاني قولتله لأ سدد اللي عليك وبعد كدة مش هسلفك تاني.. اتعصب وصوته علي، كان بيجعر بمعنى الجعير ويخبط بايده على الدولاب ويرزع بدماغه على الدولاب، انا خوفت الدولاب يقع وخوفت منه والصوت العالي وابني ٦ سنين بره في الصاله وبنتي سنتين وكام شهر شافت المنظر جريت عند اخوها.

قولتله اية الهبل ده هتفضحنا الناس سامعين. وحماتي تحتنا وسلفتي فوقنا.. وانا مبكلمهمش وبيشمتو فينا كلهم ويلقحو بالكلام وانا طالعة وانا نازلة. قولتله تتفطط تتنطط هتديني اللي عليك عشان دي فلوس ناس وبعد كدة لا تاخد مني ولا تديني.

شتمني لفظ خارج؛ انا اموت ولا حد يغلط فيا طالما انا ما غلطش فيك. رديت عليه اللفظ قولتله امك اللي كزا. شتم تاني لفظ اوحش قولتله امك واختك إلى كزا. شتم تالت لفظ اوحش قولتله امك واختك إلى كذا. شتم ابويا قولته ابوك إلى كزا. ومد ايده وخبطني على فك وشي لدرجة اني محستش باسناني ولا عارفة اقفل بؤي. قولتله انتا بتعمل راجل على واحدة ست طب اعمل راجل على الرجالة مش على مراتك؛ قال انا هربيكي وهروح اجيبلك شومة واضربك وجاب حزام البنطلون وخبطني خبطة على ايدي الدبلة غرست في جلد صابعي وفضل ينزف دم وانا مش واخده بالي وأول ما شوفت الدم محستش بنفسي روحت شادة ماسورة الستارة من ورايا على الشباك ومسكتها عشان ادافع عن نفسي؛ خدها وكسرها نصين خدت نص ومسكته وخبطه بيها مجتش عليه جت على الماسورة إلى كانت في ايده.

مسكت موبيلي اتصل على اخويا في محافظة تانية وكنا قبل المغرب بساعة.. دوخت مقدرتش ابص في الموبيل وحسيت بغممان وترجيع خدت الباسكت وقعدت على الارض ارجع وهو واقف يتفرج عليا من بعيد.

لقطت نفسي شوية لحد ما قدرت أقف. اتصلت على والدي، هو عجوز مسن وابني قالو ياجدو ماما بتعيط. وحكيتله إللى حصل قالي هاتي ولادك وتعالى وهعملك اللي انتي عايزاه.

انا زوجي مدخن وبيشرب حشيش وبانجو وقرف. ومستواه التعليمي والفكري والثقافي اقل مني؛ انا وافقت عليه لان في قرابة وقالو دة طيب وغلبان و انا امي متوفية وانا في الثانوية العامة؛ وبابا تزوج بعدها بشهور فكنت عايزة اخلص من إللى انا فيه وابعد عن البلد إللى انا فيها، فاتخطبت في تالتة جامعة واتجوزت بعد ما اتخرجت.

المهم هو راح شغله وفطرت مع ولادي ونمت في اوضة الاطفال. صحيت لقيتو مشي على شغله فنشرت الغسيل ولميت الغسيل إلى في البلاكونة وخدت الولاد ومشيت على شغلي وبعدها سافرت على بابا.

هو نزل ورانا في نفس اليوم بالليل بعد ما فطر عند اخته كانت عازماهم كلهم والمفروض اني متفقة معاه مايروحش معاهم عشان يحافظ على شكلي ومبقاش انا في البيت كله لوحدي وانا اللي وحشة. وأنه يبقى يروح يفطر معاها في اي يوم تاني.. وكلم اختي في الموبيل يقولها هي عايزاني اضرب اخوكي وابوكي بالنار ولا اية؟ عايزة تمشي تمشي لوحدها وتسيب عيالي.

وجه قابل اخويا واتكلمو واخويا كان بيحاول يحل ويهدي لحد ما يجيبلي حقوقي إللى عنده وقالي بعدها لو عايزة تطلقي هطلقك منه.

ليا عنده أرض كتبها باسمه وانا الي دافعة فلوسها وعربيتي كتبها باسم ابن عمه. بحجة اني كنت وقتها عاملة عملية وحامل ونايمة ومبتحركش. فقالي دة مؤقتا عشان نخلص الأوراق بتاعة الأرض والعربية في الشهر العقارى وكدة وانتي متتعبيش وتروحي معانا.

ولما تقومي بالسلامة هكتبهملك باسمك. وعدى سنين وحتى الآن معمليش ورق باسمي. بحجة انه لسة عليه فلوس لصاحب الأرض من أرضه هو ولما يدفعهم هيسجلي باسمي وان العربية عايزة ورقها يتجدد لسة. اخويا حس منه انه عايز يركب اخواته وأهله عليا رغم الخلاف إللى بيني وبين أهله قبل كدة حاولو يخربو علينا بيتنا واخته وعيالها واخوه هجمو عليا في شقتي وشتايم وقلة ادب وتكسير قدام الباب وفضايح وطلبتلهم البوليس لأننا كنا لوحدنا والعيال بتصرخ من الخوف ومش عارفة اعمل اية.

ولما رجع قالي انتي طالق من غير ما يسمع مني وسمع منهم بس. والسبب عيال اخته كانوا بيقطعو الزرع اللي قدام باب الشقة واحنا شايفنهم على كذا يوم وخصوصا الصبارة إللى ابني بيحبها.

المهم قل أدبه على اخويا رغم اخويا أكبر منه وقالو عيالي هاخدهم حتى لو هضربكم واحد واحد بالنار. اخويا اتعصب وطرده.

فراح لوالدي تاني يوم يشتكيلو ووالدي زعقله ازاي تشتمها هي وأهلها وتضربها وهي صايمة وفي غربة ومغلطتش فيك اصلا. وحقها أن هي تدافع عن نفسها. وقالو سيبها هنا لبعد العيد ونشوف عايزة اية تتصالح بشروط ولا تتطلق.

وبعدها مشي وخلاص ومن وقتها مفيش جديد..

وانا مصرة على الطلاق واخد اولادي معايا. بس شغلي هناك ومعرفش هعرف انقل شغلي هنا في محافظتي ولا اية. ولو قعدت هناك جنب شغلي وخدت شقة اخاف يؤذيني وييجي يتعدى علينا او يعمل مشاكل لينا.

إنسان حر

  • Sr. Member
  • ****
  • مشاركة: 349
    • مشاهدة الملف الشخصي

رد: خناقة ضرب بين زوجة وزوجها؛ ترجعله ولا تطلق؟

« رد #1 في: أيار 10, 2021, 07:33:33 مسائاً »
اختي الكريمة؛ عذرا..

انا شايفه فيلم اكشن حصل بكل تفاصيله هو صحي قالك عايز فلوس، (قولي مش معايا وبس).

لكن الموضوع تطور وكلمه منه على كلمه منك بقي اشتباكات بالايدى وكل دة قصاد الاولاد وانتي بتقولي هو بيشرب سجاير وأشياء أخرى؛ (يعني اصلا متعصب في الصيام بسبب السجاير).

وموضوع اخته في البيت؛ بتعملو مشكله عشان ولادها قطعو صبارة ابنك بيحبها (ياستي شليها من على السلم ودخليها جوة البلكونه عندك وخلاص).

انتي واقفه معاه ماديا وهو بيستلف منك ويسد؛ ودا كويس. بس معرفتيش تمتصي غضبه وهو مضايق.

متخربيش ع نفسك وارجعي بيتك، الله يصلح حالك يارب.

وخدي ابعتيله رسالة من دول: بوستات حب للزوج رومانسية من زوجة عاشقة لحبيبها