دلوقتي انا متجوزة بقالي 20 سنة، عندي 38 سنه ومعايا 5 اولاد؛ ثانوي واعدادي وابتدائي.
المشكلة في ابوهم انسان مش سوي ومعقد !
بدأ حياته معايا بكدب × كدب، ضحك عليا وعلى اهلي وفهمنا انه وحيد مامته، وان ابوه متوفي وهو ومامته بيشتغلوا وواقفين جمب بعض.
قولت عليه انه جدع وراجل ووافقت عليه بالرغم من ان اهلي كانوا رافضين وقالولي هتتعبي معاه ؛ ومصدقتش وكنت عيلة مش فاهمة حاجة، وكان النصيب من اول يوم جواز وانا اكتشفت انه ماعندوش شخصية، وان امه هي صاحبة الكلمة الاولي والاخيرة، واتجوزت معاها في نفس الشقة.
قعد معاها 13 يوم من اسود ايام حياتي، خناق وشتيمة واهانة وبهدلة وانا لسة عروسة.
طلبت منه الطلاق وقولتله وديني لاهلي، ومشيت وسبتلها العفش وكل حاجة ورجعت بيت اهلي وانا لسة عروسة، وهو صمم انه يمشي وياخدلي شقة ايجار جديد برة، رفضت وصممت على الطلاق واهلي رفضوا وقالولي الناس وكلام الناس. وطالما شاريكي ماينفعش تتطلقي.
وافقت ان ارجعله وكانت تاني غلطاتي معاه، طلب مني ان ابيع حاجة من الشبكة عشان يدفع تأمين للشقة لان اهله رفضوا يساعده وقالوله طالما هتروح ورا مراتك يبقى ماتعرفناش، اديتله نص الدهب باعه وجبنا شقة برة.
ومع العند امه خدت العفش كله واديتني بس اوضه النوم وحاجة المطبخ والنيش، وبدأ العذاب..
لقيت اهلي اتصرفولي في حاجات مستعملة اكمل بيها حياتي بدل حاجتي اللي حماتي خدتها.
وخلفت منه وبدأت اكتشفه على حققته، عرفت بعد كدة ان ابوه اللي فهمني انه مات عايش ومتجوز غير امه ومخلف منها وليه اخوات انا معرفش شكلهم ولا حاجة عنهم، كان كل حياته كدب × كدب معايا، كان يخبي مني فلوس شغله ويديني بس القد على القد، ولما اكلمه يقولي هو ده المرتب هاجيب منين.
وللاسف كانت امي الله يرحمها بقى اصعب عليها كانت هي اللي تجيب اللي ناقصني، عمري من ساعة ما اتجوزته دخل عليا بموسم، كانت امي واخواتي يجبولي ويقولوا عشان خاطر العيال.
نزلت واشتغلت واعتمدت على نفسي وعملت جمعيات وبدات افرش الشقة تاني من جديد، كنت فاكرة ان انا وهوه واحد، طلع قليل الاصل ما بيطمرش فيه حاجة، بقيت الاقي منه اسوأٔ معاملة، بقيت انا اشتغل وطالع عيني وهو عايش على فلوسي، انا اللي ادفع الايجار ومصاريف مدارس ودروس واكل وكل حاجة، ولا عنده رحمة بيا ولا بيعاملني على اني بني ادمة، ولا بسمع منه كلمة حلوة.
ده غير تربيته الغلط للعيال، ضرب واهانه وبيفرق في معاملة العيال.
العيال كلها طالعت معقدة ومعندهمش شخصية، اتكلمت معااه كتير مافيش فايدة فيه، طلبت منه الطلاق مش عاوز يطلق وشرط عليا ان لو طلق اتنازل عن كل حاجة، العفش كله اللي شقيت فيه، حتى أولادي اتنازل عنهم، رفض وانفصلنا عن بعض كزوج وزوجة بقالنا 7 سنين لكن في بيت واحد عشان خاطر ما ياخدش العيال ويهرب بيهم، وخصوصًا ان معرفش طريق لاهله ولا بلده ولا اعرف عنه حاجة.
وموت أمي وابويا كسرني، ودلوقتي بقى بيدمر في العيال، وعاوزهم يشتغلوا ويصرفوا على البيت معاه، لان من كتر اللي عملوه فيا بقيت تعبانه مش قادرة اشتغل زي الاول، بدأت احكي لاخواتي عشان يشوفوا حل معاه، قالولي احنا اللي فينا مكفينا وانتي اللي اخترتي اتحملي نتيجة اختيارك.
واحد فيهم بس اللي جه اتكلم معاه، كدبني في كل اللي قلته ونكر كلامي كله، جبت ناس من العيلة اتكلموا معاه كدبني برضو قدامهم ويحلف ان انا كدابة وان مافيش حاجة من اللي حكيتها حصلت.
مش عارفة اعمل ايه بجد تعبت، مش لاقية مكان اروحه وخايفة اخلعه يحسر قلبي علي أولادي وعيشة زفت ما بيفتكرش اي حاجة كويسة عملتها عشانه.
اسفة اني طولت عليكم واعتبروني اخت ليكم وانصحوني بما يرضي الله بدون تجريح وقولولي اتصرف ازاي؟؟
