متجوزه من خمس سنين ومعايا بنت وولد وعندي ٢١ سنه وعايشه ف بيت عيله مع مامته بس؛ وجوازي كان صالونات ومامته هي الكل في الكل، هي الي بتصرف على البيت كمان وهو كان بيساعد بشغله بس على قده، وحاليا مش بيشتغل خالص وكل لما تتخانق معانا تقوله خد عيالك واطلع برا دا بيتي، لان كل حاجه باسمها وهيا الي تقولي البسي ايه ومتلبسيش ايه وروحي ومتروحيش.
ولو هو قالي روحي المشوار ده وهي قالت لا يبقا لا، كلمتها اللي بتمشي، وحصلت مشاكل كتير وكل ماتتكلم تقول هتتطلقي ومتفكريش تعزلي لانك لو فكرتي مجرد تفكير هتطلقي، والمشاكل وصلت انها تقولي ابوكي ميجيش هنا.
وانا مستحمله عشان أولادي، حتى مامتي بتقولي استحملي عشان أولادك، واحنا مش لازم نيجي نكلم اخواتي في الفون تزعق وتقول متكلمهومش غير لما تعوزي منهم مصلحة، حتى جوزي بيقول نفس الكلام، ولو حد من اخواتي جالي تنزل تقعد تشوف جي ليه وتقلب وشها.
وانا استحملت منها كتير، ووالله لو تعبت، بقف تحت رجلها، مع العلم اني لو تعبت بيخلو اهلي اللي يعالجوني، وانا حاليًا أي حاجة محتجاها مش بلاقيها، تقولي مش بتاكلي وتشربي! خلاص مالكيش تتكلمي.
ولا حتى اني اقول لجوزي اشتغل؛ وجوزي مد ايده عليا عشان مامته قالتله كده -ابني غلط فيا وانا ضربته- راحت قالتله اضربها لما تضرب ابنك، المهم ان بعد مشاكل كتير انا روحت بيت اهلي واهلي مش راضيين اني اطلق.
حقيقي نفسيتي تحت الصفر ومش عارفه اعمل ايه، ورجعت الايام دي، والاقيهم قايلين لجوزي كلام وهو قالهولي، اللي هو يعني قولها متروحيش الحته الفلانيه -يعني هما الي بيحركوه- متخلاش تحط مكياج.. كلام من ده.
والله سمعت بنفسي انهم بيسلطوه عليا، والموضوع مضايقني اوي، لو اقولكم انا بعاملهم احسن من اهلي لاكن جايين عليا اوي، وكل شويه مشاكل، وكل ما نزعل تقول لجوزي هجوزك؛ وهو طبعا بيسمع كلامها لدرجة اني بقوله انا مستحمله عشانك انت والعيال بس بزعل لما احس انك بتسمع كلامها، ولو قالتلك طلقها هتطلقني، قالي: ايوه هطلقك لوفكرتي تعزلي.
انصحوني وادعولي بالله عليكم !
