سأشكوا لكم قصتي مع زوجتي الغيورة جدا؛ أنا راجل تخطيت الـ 53 سنة. زوجتي أيضًا داخلة على الخمسين. وصراحة كل اللي يشوفني يقول عندي يادوب 38 سنة. والحمد لله صحتي تمام التمام ومجهودي وافر في لعب الكورة ورياضي من الطراز التاني.
أعمامي وعماتي وأخوالي وخالاتي عندهم أحفاد بنات وصبيان كبار ومتجوزين. بينادوني بيا عمي.
وانا صراحة من النوع اللي الحمد لله بحب صلة الرحم وبحب أزور قرايبي وأسأل عليهم وأتصل بيهم وأتواصل معاهم. والاسلوب ده مراتي بترفضه بشكل مبالغ فيه. من باب الغيرة فقط. عندها غيرة عليا مبالغ فيها لدرجة انها تتمنى اني لا اكلم حد ولا حد يكلمني.
وساعات واحدة مثلا من حفيدات عمي او عمتي تتصل بيا تطمئن عليا وعلى احوالي. أخبارك ايه يا عمي؟ وحشتنا والله يا عمي. ربنا يطمنا عليكم يا عمي. وهكذا. وطبعا بعد المكالمة ما تخلص بألاقي البوز المحترم والمعاملة اللي مش كويسة. أحيانا أسكت من باب إرضاء لزوجتي ولنفسيتها. وأحيانا أتجاهل.
وطبعا معظم المناسبات لا أحضرها بسببها.
فما الحل والاقتراح من فضلكم؟؟
