بجد أنا مش عايزة اتجوز ؛ أنا زعلانة جدًا ومتضايقة إني حاسة إني غريبة ومش طبيعية و uncommon على كوكب الارض ومفيش زيي كتير وإللي زيي نادرين على كوكب الارض. ومش لاقية حد بيفكر زيي خالص والموضوع ده مخليني حاسة بغرابة ومتضايقة جدا إني حاسة نفسي مش طبيعية و غريبة وتفكيري غريب.
أنا آنسة عمري 48 سنة ومش عايزة ارتبط خالص عشان المسؤولية و الحرية وراحة الشغل والمصاريف وخلاف ذلك.
واخويا فيرجن عنده 42 سنة برضه، وهو مش زعلان إنه غريب ومش متضايق زيي خالص.
بالرغم إن الناس مستغرباه وبتقول عليه غريب زيي، أنا إللي بتضايق من إن الناس بتقول عليا معقدة ومجنونة ومش طبيعية ومخالفة للغريزة إللي ربنا خلقها عشان البشرية متنقرضش وبيقولولي روحي اتعالجي عند دكتور.
ولما باشتكي لاخويا من الكلام ده بيزعل مني و بيتخانق معايا ويقولي إحنا مش هنمسك لسان كل واحد عن الكلام.
أنا دلوقتي ادافع عن نفسي إزاي ونسبة الناس إللي بتفكر زيي وواخدين القرار ده زيي أقل من 3% من سكان الكرة الأرضية؟
وادافع دينيا وعلميًا إزاي عن قراري؟
لأن العلم والدين بيقولوا إن ربنا خلق الغريزة دي جوانا عشان الإنسان مينقرضش!
إزاي أبرر لنفسي وللناس إني طبيعية وعادية وإن تفكيري ده متداول وعادي جدا ومش عيب ولا حرام؟
ملحوظة: لا بكره الرجالة ولا متعقدة منهم ولا بقول عايزة أجنبي والكلام ده.
أنا واحدة متصالحة مع نفسي وبقول أنا مش بتاعة مسؤولية ومشاكل وتربية عيال وبشتغل براحتي وبسافر تبع الشغل بالاسابيع؛ وعادي جدا مفيش أي عقدة نفسية من أي راجل
