انا فعلا محتاجة رأيكم لانى بجد تعبت ومش لاقيه حل لمشكلتى للاسف؛ البداية كانت الغلطه اللى دفعت تمنها غالى اوى لما اتجوزت جوزى والى اكبر منى ب ٢٥ سنه !!!
وعلى فكره انا اتجوزته وانا بحبه، مش لاى سبب تانى زى ما كتير منكم هيفكر، وللاسف كمان هو كان متجوز قبلى بس هى ربنا حرمها من الانجاب ومخلفتش طبعا هو حقه شرعاً يتجوز.
المهم احنا اتجوزنا وانا لانى كنت بحبه معملتش اى اعتبار لفرق السن ولا لوجود زوجته الاولى وبعدين بدات تظهر المشاكل.
حاجات كتير بدات تحصل زى انه كان بيسيبنى وانا لسه عروسه ويروح يبات مع زوجته الاولى رغم انه كان قايل انهم منفصلين وانه هيطلقها وانها ملهاش لازمه عنده وان عيوبها كتير وكلام كتير بقا؛ وواضح انه كان كله كذب.
انا عارفه انكم هتبداوا تشتموا فيه وفى غبائى وطبعا كلكم عندكم حق؛ جوازه غير متكفأه بالمرة.
رجعت لاهلى وطلبت منهم يطلقونى منه وكان رد فعلهم غريب، أو مش غريب، لان السلبيه طبعهم وكان ردهم معندناش بنات بتطلق وكملى بقا وخلاص طالما كنتى بتحبيه وطالما بيصرف عليكى ومش بيهينك مفيش سبب تطلقى علشانه ؟!
مش عايزه اطول فى شرح حياتى معاه كانت عامله ازاى، من كرهى ليه ولكذبه ولا لاعتباره انه معندوش اى عيب واى بنت كانت تتمنى تتجوزه وكلام بقا كتير ملوش لازمه، وللاسف خلفت ٣ عيال لانه كان حريص اوى يربطنى بالعيال عكس تفكير معظم الرجاله !
معظم الجواز مشاكل وخناقات، ووقفت على الطلاق مليون مرة، وطبعا هو معندوش اى استعداد يطلقنى رغم انه عارف انى عايشه معاه غصب وانى ندمانه على الجوازه وكنت بقولها صراحة فى وشه، ولابيفرق معايا.
هو يحاول يراضينى مره، ومره يسيبنى اخبط راسى فى الحيطه وان كان عجبك.
ومره انا اقول اهى عيشه والسلام ويمكن هو احسن من غيره والدنيا كانت بتمشى بالضالين.
دلوقتى انا بعد كل السنين دى مش حاسه اصلا انى اتجوزت وفرق السن بقا واضح اوى فى كل حاجه، وكلامه عن الموت وانه مبقاش حمل مشاكل، واقعدى بقا ربى عيالك، وكمية احباط رهيبة، وانا لسه فى بداية الاربعينات وشكلى اصغر من سنى بمراحل، لدرجه ان محدش بيصدق ان بنتى الكبيره بنتى ودايما الناس تقول جبتيها امتى دى !!
انا حالياً واقفه على الطلاق لان -وبدون ذكر تفاصيل محرجه- انا كست محتاجه راجل اكمل معاه اللى باقى من عمرى ويعوضنى عن كل الحرمان والعذاب الى شوفته.
ناس تقولى يعنى انتى هتتجوزى تانى ولا ايه فاكره نفسك صغيره ؟!
وناس تانيه تقول لو بتطلقى علشان عاوزه تتجوزى محدش يقدر يلومك وده حقك.
وانا واقعه مابين أولادي ومصلحتهم وبين انى مشفتش جواز اصلاً.
وبدأت أفكر فى نوعيات الزواج الى مفيهاش الزام أو ضرر لأولادي، وسمعت عن زواج المتعة أو المسيار ومعرفش دول اصلا حلال ولا حرام ولا ايه الافضل لحالتى؟ ارجو منكم التفهم وعدم التجريح أو الاهانه لان ببساطه انا عاوزه اعف نفسى فى الحلال مش الحرام رغم انه متاح وكتير اوى زى ماكلكم عارفين.
