مشكلتي مع خالي اللي بيكرهني

[محتار]

لي خال بيكرهني من صغري، وامي السبب، لان بابا طيب وغلبان كان كل ما يحصل حاجه تبعتله يضربني.

المهم حصل مشكلة السنة اللي فاتت، وهو المفروض أنه يكون طرف في الصلح مع اخويا، واحنا عنده، اخويا غلط فيه، بقوله عيب احترم نفسك؛ قام خالي فضل يضربني على دماغي وعلى وشي، واخواتي مش عارفين يسلكوا منه، وشتائم على أمي وابويا وعليا وعلى بناتي، وانا كل اللي قولته (انت ظالم)؛ طردني انا واخواتي من بييته.

دلوقتي مرات اخويا الكبير عاوزه تراضي أمي عليهم، لأنها حبيبتهم اوي اوي، وامي مش راضيه، وأنا كده هقاطع اخويا بسبب مراته، هي كده كده كرهاني وبتغير مني على اخويا.

لو روحت عند ماما هعمل مصيبه! ارجوكم قولولي اعمل ايه؟

[إنسان حر]

حاولي تفصلي في العلاقات وتتقي الله في قطع الرحم، يعني امك فضلت مخاصمة اخوها سنة، اذا اعتذر لها ورضاها وهي قبلت خلاص ربنا يصلح الحال.

انتي نفسك مش قابلاه ومش مسامحة براحتك، لا يكلف الله نفسا الا وسعها، لانك اتاذيتي منه.

أخوكي انتي بقي علاقتك به صلة رحم ودم، وملهاش دعوة بمراته، تحب مين ولا تكره مين ولا بتعمل ايه، خليكي مع اخوكي بس.

مش لازم الدنيا كلها تبقي والعة في بعض والكل متخاصم عشان نحس ان حقنا رجع، وبلاش القطيعة تبقي سهلة كدا عشان حسابها كبير، حتى لو خالك غلطان واسلوبه وحش ومفيش تفاهم مكنش له لازمة حد يدخل بين الاخوات، لا خال ولا عم، كنتوا قعدتوا مع بعض ومع والدتكم واتصافيتوا، خصوصا انكم عارفينه من الاول.