اختصار المشكلة: جوزى اتجوز عليا هل اطلب الطلاق ؟ والتفاصيل: ان انا متزوجة من ١٤ سنه وعندي ٣ أطفال (ولدين وبنت)، وزوجي على طول مسافر وفجأة قرر يتزوج في عز ما انا بحضر لميعاد نزوله واستقباله بعد غياب سنتين فوجئت بيه نازل يتزوج بدون أسباب واضحة.
رغم غضبي وثورتي وعملت كل اللي اقدر عليه علشان امنعه من الزواج وبرضو اتزوج.
انا ناويه اتطلق منه لانه طول عمره معايا مش كويس، وعمل مواقف كتير جدا جدا وحشه معايا وكان بخيل عليا في المصاريف مع انه مع أولاده كريم عليهم، لكن لو طلبت حاجة لنفسي كنت بحس اني بشحتها منه.
وخاين؛ كلم بنات كتير قبل كده واكتر من مره عاتبته ومافيش فايده، وكان بيتكلم عليا بطريقه مش كويسه مع أصحابه الشباب، حاسه نفسي معاه ماليش اي قيمة.
وفي الاخر نزل واتجوز عليا بدون اي مقدمات، وفضلها عني، وهي مطلقة، وجاب الشبكه بمبلغ كبير، ومهر كبير، وبنا لها بيت في البلد جنب والدته، لأن العروسه الجديده تبقا بنت خاله.
واحنا ساكنين في القاهره مع اولادي في شقة الزوجية.
المشكله انه عنيد ومش عايز يطلق بسهولة، وانا قلتله لو مطلقتش هارفع عليك قضية بس مش عايزه اعمل كده علشان بينا اولاد، ومش عارفه اعمل ايه.
هو كده كده مسافر على طول، يعني انا شايله المسؤوليه لوحدي. ولما ينزل اجازة كل سنة او سنتين يبقا يشوف أولاده ويقعد معاهم زي ما هو عايز.
عيلتي خايفين انه يعند معايا وياخد مني اولادي أو يقصر في مصاريفهم أو يخرجهم من مدارسهم الخاصة.
خايفين من رد فعله لو صممت على الطلاق، وبيقولوا ليا استحمل واعيش وارضى بالأمر الواقع واعتبره كأنه مش موجود في حياتي.
بس انا خلاص بجد قفلت منه وكرهته جدا، لأنه كسر نفسي كتير جدا ومش عيزاه في حياتي تاني.
وهو اناني مش بيحب غير نفسه، وإصراره انه مش عايز يطلق علشان أفضل كده على ذمته ويتحكم فيا براحته ويضمن انه اعيش تحت رجله العمر كله.
انا عايزه ارفع قضية طلاق أو خلع، وصليت استخارة ونفس رأيي وكل يوم بقتنع بيه اكتر؛ ممكن رأيكم لو مكاني تعملوا ايه؟
