هاكلمكم عن تعامل أهلي معي سواء بعد طلاقي أو بعد زواجي الثاني. انا مطلقة بسبب شرب المخدرات والضرب والاهانة؛ ومعايا بنت. كان معيشنى في ذل، مصروفي كان ٣ جنيه في اليوم، اتطلقت ورجعت عشت عند أمى، أتذليت اكتر.نزلت اشتغلت وسبت بنتى في حضانة وهى لسه طفلة، كل يوم ٨ ساعات، عشان امى مش عايزه تقعد بالطفلة تغيرلها كل شوية؛ وانا طبعا خدت لقب مطلقه ادام العيلة، كنت بسمع كلام بيموتنى.
غير اخويا ومراته والشماتة والمعايرة، المهم تعبت وقبلت اتجوز، قلت هارتاح وربنا بيعوض خير.
اتقدملى واحد كويس وقبل بنتى وحبها وحبيته واتجوزنا، اخويا كان رافض عشان مرتاح ماديا، واخويا مبيحبش حد احسن منه.
محضرش كتب الكتاب وقطع علاقته بيا نهائي. وامي بتعرفنى دلوقتى للمصلحة بس، تعبانة تيجى تقعد اسبوع تغير جو، محتاجه حاجة اجبهلها؛ اخوها -عياله سايبينه- محتاج حاجه اجيبهاله.
كنت بقول امى، مش مهم، بس لقيت الموضوع زاد عن حده، مش قادره انسى اللى عملوه معايا وانا عارفه انهم عارفينى مصلحة.
بعدت بقالى مده محدش مهتم ولاسال حتى، عادى... تعرفو! اقسم بالله انا عمرى ما عملت لحد حاجه ولا زعلت حد؛ انا موجوعه اوى حاسه انى لوحدى.
اهلى وحشين اوى، المشكله ان جوزى مسافر وبينزل اجازات بس، معقول الحقد والطمع والغل والكره كل ده جواهم ليا.
اعصابي تعبانه اوى والله..
