انا عندى ٣٣ سنة واتجوزت في بيت عيله شهرين وبعدين زوجي سافر. قاعد دلوقتى قرب السنتين مع العلم انى كنت حامل ونزلت قبل ما يمشى، وجه ميعاد سفره فسافر وسابنى مع اهله وحصلت مشاكل كتيرة جدا، وضحيت كتير، كنت عاملة زى الخدامة لاهله، وده كمان مع الاهانة كل شوية، واخواته مسموح لهم كل شئ والبنى آدمة اللى فى البيت مش لها اى حق من حقوق اخواته.واخواته بتوع حوارات جدا، كل شوية جايبين عاملين مشكلة ويعمولولى قعدات كتير مع ناس عيلتهم، وكل يوم والتانى اهانات، وكل نفس بتنفسه بيروح لجوزى وهو فى الغربة، فى المقابل يقولولي ممنوع حد يقول حاجة للناس اللى فى الغربة عشان الزعل، ومش يشيل من حد من اهله، والاقى كل حاجة بيقولوها لجوزى، وطبعا مش كل الكلام صح، والاقيه بيكلمنى فى المشكلة وبيتخانق معايا.
وكزا مرة لما اجى اروح عند اهلى الاقيه هناك بيكلمنى يزعق معايا، مع العلم انى بابقى عاملة لحماتي كل حاجة قبل ما اخرج، وعشت معاه سنة ونص فى الموال ده.
وقبل رمضان كنت رايحة ازور اهلى، تعبت هناك وعلقت، وكنت فاقدة الوعى، واخته اتصلت عليا وطبعا مش كنت عارفة تليفونى فين ولا حاسة بأي حاجة، المهم اتصلت على اختى وعرفت انى تعبانة ومعلقة، وانا كنت خارجة طبعا، بعت لجوزى انى خارجة وقولت لاخواته وامه، وخرجت.
وطبعا جوزى بيقعد بالعشرين يوم مخاصمنى.
فى المقابل يكلم اهله كلهم وانا قاعدة ولا كأنى موجودة، ولما الاقيه نشط اتصل عليه مش يرد عليا، وبيبقى لسة بيكلم اخواته، وكل مرة اقوله عيزاك ضرورى عشان اقوله على حاجات تعبانى، ارجع تانى افتكر انهم قايلين ليا محدش يوصل حاجة للناس اللى فى الغربة، وعشان مش يشيل من اهله فى حاجة.
وجيت على نفسى كتير فى حاجات كتير كنت المفروض اخرج فيها واروح عند اهلى، بس اقول يا بت عيشى واستحملى عشان جوزك.
فضلت لما نفسيتى تعبت جدا وحسيت هيجيلى امراض مزمنة، ضغط او سكر، المهم لما روحت عند اهلى، طول الليل معلقة محاليل وتعبانة جدا، جه يكلمنى الصبح يقولى انا مش قولتلك مش بحب مراتى تنام برة بيتى -مع العلم انى هو مش بيكلمنى قبل ما اروح عند اهلى بعشرين يوم- وانا اتصلت عند الدكتور قايل مش عندها حاجة، وخليكى بقا عندك مش تروحى تانى لحد ما ارجع، ربنا يسهل.
استحملت كتير جدا، وكل يوم مشاكل وصوت عالى، ومشكلة تبدا من العصر ممكن تنتهى بعد العشاء او متأخر، كلها اهانات وتجريح، وشتمنى بأهلى اكتر من مرة، واعمل نفسى مش سامعة واطنش، لحد ما بقى يسوق فيها، وشاف ان اهانتي كل يوم بقى حق مشروع.
سابنى عند اهلى لحد دلوقتى مش سأل حتى عليا، وجه رمضان والعيد مش سأل خالص ولا كأنى موجودة فى حياته، طبعا وانا عند اهلى سمعت عن نفسى واهلى كلام يوجع جدا، وانا مستنياه يرجع من السفر عشان نعمل قعدة ويعرف كل حاجة اهله عملولها فيا، والبهدلة والذل اللى شفتهم بغيابه وهما بيوصلوا له الكلام اللى هما عايزينه، مع العلم انه عنده ٧ بنات دائما قاعدين فى البيت بيروحوا قليل وبيدخلوا فى كل شئون حياتى، وابوه وامه وممكن جوزى مش ييجى ولا يرضى يعمل قاعدة، افيدونى ماذا افعل؛ تعبانة جدا!
