انا عندى 16 سنة، ساكنه فى بيت عيله جدي، ومليش حد غيرهم، بيت جدى فيه اعمامى واسر كتير، عمي الكبير هو واسرته قاعدين معايا فى الشقه بتاعة بابا الله يرحمه، علشان أمى وأبي متوفيين، بيعتبرونى بنتهم وانا بعتبرهم امى وابويا علشان ربونى من وانا طفله وعندى يوم.امى اتوفت وهى بتولدنى، هما شايفينى بنتهم وانا شيفاهم امى وابويا ومعندهمش بنات بس عندهم ولدين كبار، مشكلتى مع ابنهم الكبير وعنده 30 سنه، وهو دكتور وشكلة جميل جداً وفى البيت عاملينه قدوة ليهم، بيحترموه وبيخافوا منه. بس بيمد ايده عليا بحجه انى مراهقه وطايشه، بيضربنى بغباء، ولما بشتكى لابوة وامه بيقولوا اخوكى الكبير.
هو متعود يضربنى من وانا طفله ويمد ايده عليا، بس دلوقتى انا كبرت وبضايق من الطريقه دي لدرجه انى بقعد فى الاوضه ومش بطلع منها غير للضرورة، بقا عندى فوبيا منه، مجرد ما اسمع اسمه بخاف واختفى.
بس المشكلة الكبيرة ان بنات عمي بيدخلونى فى مشاكل، وانا بحاول بأي طريقه معملش مشاكل عشان هيتعرضلي، ولو فى حد اتنفس فى البيت بيقولوله، وانا تعبت جدا ومش قادرة اعيش زى البنات، على طول خايفه وعايشه فى هم ومتوترة، وحكيت المشكلة دى لواحدة جارتي قالتلي امشي وسيبي البلد، انا عاوزة اعيش في امان.
