مشكلتي في جوزى مش اجتماعي اوى ومش بيحب الزيارات وحتى في عزومات رمضان يقولي انا ولا بعزم ولا بتعزم، بيقولي انا اتعودت على كده، بس لما بابا بيعزمه في رمضان بيروح، وكذلك مامته برده اما بتعزمنا بنروح، غير كده مبنروحش حتى جوز اختي عزمنا في رمضان مرضيش يروح، واختي قالتله لو رمضان مش مناسبك خليها في العيد.
واتقابلنا في عزومة رمضان عند بابا، اختى وجوز اختي اكدوا عليه ييجى في العيد، والعيد جيه وهو وبرده مش عاوز يروح، قولتله طب اروح انا وابني، برده مرضيش.
انا شكلي وحش قدام اختي، مش عارفه اعمل مع جوزى ايه، نفسي يتغير اوى، انا دخلت عليهم وهما كده فعلا، انهم مش بيتعزموا عند حد ولا بيعزموا، انا متربتش علي كده، احنا بيتنا كان مفتوح للكل، وعزومات متبادلة، حتى خالاتي كانوا بييجوا عندنا، مش شرط أزواجهم كانوا ييجوا.
هو حتي مش راضي اروح عند اختي، حتي اتعزم عندها واخلق اي سبب انه مجاش.
وليه بقى مبدأ غريب، يقولي انا لو روحت لازم اعزمهم، قولتله مش شرط، ممكن تعزمهم في أي وقت مش لازم تحدد، وبعدين يقولي انا مش ببطن، اروح علشان اكل، وبيقولي فيه مثل بيقول: اطعم الفم تستحي العين، انا لما اتعزم عند جوز اختك كده بيكسر عيني، هو عنده عزة نفس صعبة اوي، حتى في اول جوازى لما اهلي كانوا يجبولي حاجه كان يتضايق اوي، ويقولي هو انتي ناقصك حاجه؟
انا مش عارفه اعمل معه ايه، نفسي يتغير وتفكيره يتغير، الدنيا ابسط من كده، واحنا معندناش العقد دي، بحس تفكيره غريب وفي نفس الوقت هو بيعرف في الواجبات اوي.
