كنت فاشل وأهلي كرهوني.. بس انا دلوقتي كويس وبردو لسة بيكرهوني

[محتار]

انا شاب 21 سنة؛ اختى اكبر واحدة 28 سنة، وبعديها اخواتى الاتنين وانا الاصغر.. انا في فترة الابتدائية كنت شاطر ومحترم زيادة شوية.

لكن بعد ما دخلت اعدادي وبقت فاشل ومع شلة افشل وطباعي اتغيرت ومكنتش بصلي وبقيت انسان ما يتحبش واهلي كانوا مش بيحبوني بالاضافة انهم بيشوفوني بعمل حاجات غلط...

لكن دخلت الثانوية واتغيرت واتخلصت من الصحاب الفاشلين ورجعت شاطر تاني وكملت بعدها تمريض ومن الاوائل كمان..

والحمد لله منتظم في الصلاة وبحاول اكون انسان كويس.

لكن مشكلتي ان اهلي -اقصد اخواتي- لسه زي ما همه مش بيحبوني مع اني بعشقهم وكانهم قلبي اللي بينبض عشان اعيش..

محدش فيهم بيحب يتكلم معايا اصلا لدرجة مبيحبوش يخلوني اقعد معاهم وهما مع صحابهم، ولما بغيب عنهم وببقى في الكليه في الغربة محدش بيسال عليا، ولما اسال انا بيردوا ببرود -دا ان ردوا اصلا-.

محدش بيشاركني حياتي اليومية زى باقي الناس، وحاسس اني مليش اخوات...

حتى الناس بتستغرب من كدا... انا نفسي في اخ سند واخت حنينة تواسيني.

اسف على الاطالة لكن المشكلة دي مش مخلياني عارف اكمل حياتي وبفكر اسيب البيت واعيش بعيد.

مشكلة زائر

[مستشار]

اخي؛ هي مرحلة وعدت الحمد لله في حياتك ورجعت تاني، ممكن تتكلم مع اختك الكبيرة او مامتك هتسمعك وتفهم انك اتغيرت وكذلك باقي الاخوة.

هما ممكن يكونو محتاجين يصدقو بجد انك اتغيرت ومبقتش زى الاول ... وواحدة واحدة الامور هترجع تاني. الله يصلح حالك يارب!

[جناح طاير]

ولا الاخ سند ولا الأخت احيانا بتواسي، سندك ربنا ونفسك.

اتعامل معاهم عادي، وشيل فكرة انهم بيكرهوك دي من دماغك خالص واتعامل معاهم بمعاملتهم وركز اوووي فى شغلك وانجح واعمل بيت واتجوز.

ولادك هما إللى هيبقوا سندك لو ركزت وربتهم صح وراعيت ربنا فى زوجتك.

[إنسان حر]

متمحورش حياتك على حد حتى لو اخواتك.

انشغل بحياتك واصحابك ودراستك واقراء وروح جيم.

وأوصِل طبعا اخواتك بالقدر المسموح، لانه في الغالب هما منشغلين بحياتهم وانت منشغل بهم.