انا عندي مشكلة وعاوزه آراء حضراتكم فيها، هي مشكلة شخصية، أولا بعد الصلاة علي الرسول صلى الله عليه وسلم، انا آنسه ابلغ من العمر 32 سنه الحمد لله رب العالمين ملتزمة أزهرية متخرجة من جامعة الأزهر، ربنا كرمني وحفظت القرآن الكريم كاملا بالتجويد، فتاة طموحة جدا متفوقه في دراستي حصلت في الكلية على جيد جدا مع مرتبة شرف، وأخدت التربوي والتمهيدي الماجستير والماجستير بتقدير ممتاز.
ربنا سبحانه وتعالى أنعم عليّ بنعم عظيمة، من أجلّ واعظم النعم دي حفظ القران، بحس ان ملكة وانا بسمع القران مع نفسي، والحمد لله اتعينت مدرسة قران كريم في الازهر الشريف.
هبدأ مشكلتي، رغم كل الصفات دي وانا غير
متزوجة، ربنا سبحانه انعم علي اني اكون قصيرة الي حد ما، كل ما يتقدم لخطبتي شخص لم يتم النصيب، معظم الرفض بسبب اني قصيرة او بسبب ان ما بيحصل قبول بيني وبين الشخص مع اني والله الحمد لله جميله جدا.
بسبب اللي بيحصل ده بدأت اتعقد من حياتي، وعدت بكره الحياه، ولا احب أخرج من البيت، عدت بحس اني ما حد يحبني، عدت بحس احساس غريب اني مكروهة من الناس، وانا ذنبي ايه ان ربنا خلقني قصيره شوية، ربنا عوضني بحاجات جميله بس كله بيبص للمظاهر.
عدت بخاف اخرج من البيت، بدأت اميل اني اكون وحيده، كرهت الحياه، المفروض اي بنت يقولها ان في اي عريس جايلها بتبقي مبسوطة، انا خلاف كده ببقي خايفه من ردود الافعال اللي بتحصل بعدين انه يرفض او كده.
علي الرغم يعني ما فيش ناس كثير بيتقدموا، انا حاليا بقالي مدة تعبانة من كثر التفكير في الموضوع ده، بقيت مدمره نفسيا. حاسه ان الحياه سوداء من كثر التفكير وان سني عدي الثلاثين ولسه لم اتزوج، حتى شغلي اللي كنت بحبه عدت بحس كل يوم وانا رايحه الشغل اني زعلانه ومعيطه لان مافيش تغيير، كله زي بعضه.
ياريت تنصحوني اعمل ايه، واسيطر على التفكير ده ازاي؟ والله ما بنام من كثر التفكير والبكاء.
