أنا كنت متزوجة من ٤ سنين وانفصلت ومش معايا اولاد واتجوزت تاني من سنتين ونص.
وجوزي كان متجوز وعنده ٣ اولاد ولكن انفصل عنها.
المهم تزوجنا عن حب؛ هو أكبر مني ب ١٤ سنة بعد الزواج على طول اكتشفت أني حامل في توأم؛ وهم حاليا سنة ونص.
من حوالي ٦ اشهر بدأت احس ان جوزي بقي متغير معايا، مش زي طبيعته معايا خالص بالنسبه للاهتمام والمشاعر وكده.. وحتى بالعلاقات الشخصية حاسة ان وجودي بقي مش مرغوب فيه.
المهم مسكت موبيله بالصدفة ولقيت شات بينه وبين طليقته وعرفت أنهم رجعوا لبعض عشان الاولاد ونفسيتهم وكده..
معرفش رجعوا امته ولكن خلاص بقى أمر طبيعي وهو مجبش لي سيرة خالص؛ ولما واجهته وقولت له ليه ضحكت عليا وغشتني و و و بكل ادب واحترام - راح متشنج.. وانا اعمل ايه؟ واولادي.. وامي بتزن.. واخواتي واهلي و و و.
طب أنا ذنبي ايه اكون زوجة تانيه يعني وهي هتشاركني فيك؟ قالي احنا رجعنا كده وبس.
المهم أنا طبعا الغيرة موتتني؛ اخدت اولادي وسبت البيت ورحت عند اهلي؛ طبعا بابا جه عليا. لأنه من اول ما جوزي أتقدم لي وانا وافقت بيه بابا حذرني أنه مسيره في يوم من الايام هيرجع عشان خاطر الاولاد وانا قولت لبابا لا مش اكيد هو مش هيعمل فيا كده.
المهم هو كلم بابا ومعرفش قاله ايه ولقيت بابا بيقولي يلا عشان تروحي بيتك؛ قولت له لا وازاي قالي ده بقي أمر واقع خلاص وهتضطري تعيشي عشان خاطر اولادك مش يتربوا بعيد عن باباهم.
طبعا أنا منهارة من العياط وحاسه بقهر وبندم اني تزوجته اصلا على الرغم أن اقسم بالله العظيم اقسم بالله العظيم أنا ما مقصره في اي حاجه خالص ولا معاه ولا مع الاولاد وبشهادة منه هو وكل اللي حوالينا عارفين كده.
عاوزه اقولكم أنى بحبه جدا ومقدرش استغني أنه.
ممكن نصيحة لوجه الله اني اكمل وانا انضحك عليا وغشني؛ ولا انفصل عنه وقدر الله وما شاء فعل؟ شكرا لكم.
مشكلة زائرة
