انا مخنوقه وتعبانة، بجد هو ذنبي ايه اني اطلقت؟ واقسم بالله انا عمري ما فكرت في الطلاق ولا كنت عايزه اطلق. منهم لله اللي كانوا السبب؛ حسبي الله ونعم الوكيل.
انا كنت مستحمله كل حاجه.
اول حاجه عشان مقعدش في بيت اهلي لان معاملتهم وحشه ولا بيحتووني وبيفرقوا بيني وبين اخواتي؛ كانت فيه ناس تقولي نار جوزك ولا جنه ابوكي ومكنتش اعرف معناها؛ لما جربت بجد عرفت معناها ايه.
انا بجد كرهت عيشتي بسبب اهلي، محدش بيطبطب عليا ولا ياخودني في حضنه، لدرجه انهم سابوني انا وعيالي نفطر لوحدنا وهما لموا بعضهم وراحوا فطروا عند اختي.
انا بجد حزينة على نفسي، انا زهقت وتعبت، بجد من معاملتهم دي خلتني ابقي قاسية عليهم بس غصب عني والله من اللي شوفته وبشوفه.
انا نفسي ارجع لجوزي وعارفه ان دا مستحيل وده اللي قاهرني اكتر، عارفه انه مش هيرجع بعد اما طلقني واهله قالوا كلام وحش عليا وهو مش عارف يرجعني عشان الكلام وعشان الناس هناك؛ بس اقسم بالله انا مش وحشه. وكان نفسي يبقي فيه فرصه تانيه اثبتله فيها اني اتغيرت وان انا كويسه بس عارفه انه مش هيرجعني؛ ولو هو حتي اتجوز انا مش عايزه اتجوز غيره.
بجد تعبت انا بتمنى الموت بجد عشان اطلع من اللي انا فيها دا.
بالله عليكوا من غير تجريح فيا اقسم بالله انا جوايا كمية وجع ميعلمش بيها غير ربنا سبحانه وتعالي انا بجد مش عارفه اعمل ايه ؟
