الحكاية اللي هقولها دي مداها ٢٠ سنة فاتت.
انا كان ليا اخ وحيد اكبر مني ب ٦ سنين... اخويا زمان كان خاطب واحدة محترمة وكويسة جدا وعيلتي كلها كانت بتحبها وانا وابويا وامي بنحبها واخويا نفسه كان بيحبها لأنها كمان كانت زميلته في الكلية.
بعد ما اخويا خطب اتعرف على واحدة سمعتها وسمعة أهلها وحشة جدا ومن منطقة خالاتي ساكنين فيها يعني عارفين اهل البنت دي كويس وعارفين سمعتهم (البنت اكبر من اخويا ب ٣ سنين وكان مكتوب كتابها مرتين وأطلقت) ... وابتدت تلف على اخويا وتشتغل عليه بالأعمال والسحر... خلته ساب خطيبته وقرر انه يرتبط بيها ويتجوزها... عيلتي كلها كانت مش موافقة ومعارضه جوازه منها لان سمعتها على كل لسان حتى الاغراب من اهل منطقتها كانوا بيحذروه منها ومن أهلها وانه ابن ناس ومحترم وعيلته اللي هو احنا ناس كويسة ومينفعش يتجوز واحدة بالأخلاق دي... ابويا وامي وانا كنا معارضين الجوازة دي وبشدة وقالوله محدش حيحضر فرحك ولا هيدخلك بيت وحتى اخوك اللي هو انا هيخاف بعد كده على مراته وولاده من اختلاطهم بواحدة زي دي وولادك منها.
ابويا وامي ماتوا بفارق ٣ ايام وساعة ما ماتوا البنت اللي اخويا عايز يتجوزها دي فرحت جدا وكأن كل مشاكلها في الحياة اتحلت مبقاش فاضل قدامها الا مشكلة واحدة اللي هي انا.... اخويا بعدها ذاع بين الناس أن ابويا وامي قبل ما يموتوا وافقوا على جوازته دي وده طبعا محصلش.. واتجوزها في النهاية ومحدش فعلا حضر فرحه سواء انا او خالاتي وأعمامي... بعدها انا اتجوزت بنت عمتي وعيشنا حياتنا طبيعي.
على مدار ٢٠ سنة مدخلتش بيت اخويا ولا مرة وهو كان بييجي عندي مرة في السنة وكنت كل ٣ او ٤ شهور اتصل بيه اتطمن عليه أو اروح اقابله على القهوة... كنت دايما انا اللي بتصل بيه واجري وراه.. وهو انا مكنتش في دماغه خالص ولا فارق معاه واخد اهل البنت اللي اتجوزها دي على انهم دول عيلته واهلة ونسي اهله الحقيقين.
من سنتين انا سافرت دولة اجنبية بغرض الاستقرار فيها كهجرة وولادي ومراتي لسه في مصر وبخلص إجراءاتهم علشان يجولي قريب... على مدار السنتين دول اخويا ما اتصلش لولادي ومراتي ولا مرة علشان حتى يسأل عليهم... مع ان مراتي طيبة جدا وتبقى بنت عمته.. يعني قريبتنا ومن العيلة... ولما كنت بلوم عليه.. يا اخي طب اتصل بيهم مجاملة شوفهم بس عايشين ولا ميتين مش اكتر... مكانش يرد عليا ويتوه الموضوع وانا كنت زعلان منه جدا بسبب حاجة زي كده بس كنت برضوا كل شهرين تلاتة اتصل بيه واتطمن عليه.
في شهر مارس اللي فات جاتلي رسالة من صديق اخويا ان اخويا اتوفى -موت فجأة- في اللحظة دي حسيت ان حياتي وقفت وكأن حد حط سكينة في قلبي... رغم سوء علاقة اخويا بيا بس لحد دلوقتي مش مصدق انه مات وزعلان جدا عليه... بس زعلان منه برضو انه خلى علاقتنا طول السنين ببعض كده رغم اني كنت دايما بحاول اقربله بس انا بالنسبة له مش فارق معاه.
بعد وفاة اخويا على طول لقيت بنته الكبرى ١٤ سنة (و عنده بنت وولد تانيين أصغر) لقيت بنته ابتدت تبعتلي رسايل وتسأل عليا... انا فرحت وقولت هاعوض علاقتي باخويا في ولاده وهبقي مسئول عنهم اساعدهم باللي اقدر عليه واللي هيخلص الثانوية العامة منهم هجيبه يدخل الجامعة في البلد الأوروبية اللي انا عايش فيها... ومراتي رحبت باللي بفكر فيه وما اعترضتش اطلاقا.. بس لاحظت دايما وانا بكلمها في التليفون كأن حد قاعد جنبها وبيسمع المكالمة وبيقولها تقول ايه... في نفس الوقت كان صديق اخويا بيتصل بيا كتير علشان مرات اخويا بتقول ان فيه فلوس ومستحقات بتاعت اخويا في الشغل وان مراتي راحت صرفتها... وطبعا الكلام ده محصلش ومكنتش اعرف عنه حاجة.
جالي اتصال من زميل اخويا في الشغل بيقول ان اخويا ليه مستحقات لازم يصرفها والفلوس دي كان كاتب وصية اني انا اللي اصرفها... انا قولت طبعا مش عايز اي حاجة وولاده أولى بالفلوس دي وخليت مراتي راحت الشغل عنده وعملت تنازل بالتوكيل اللي معاها ان الفلوس دي مرات اخويا وولاده هما اللي ياخدوها.... وخلال الوقت ده بنت اخويا كانت بتتصل بيا وانا بتصل بيها واكلمها واكلم أخواتها وبحاول ااقرب منهم.
بعد ما مرات اخويا راحت الشغل عنده واستلمت الفلوس بقيت كل ما اتصل ببنت اخويا متردش وبعدها تبعتلي رسالة كلام فارغ... اصل مسمعتش التليفون.. اصل كان عندي درس.... وهكذا... كل ما اتصل بيها متردش.. بعتلها رسالة وقولتلها عيب اوي لما اتصل بيكي اكتر من مرة وما ترديش عليا.. انا مش هتصل بيكي تاني.
البنت بعدها مبقتش تتصل بيا خالص وكأن الموضوع كله من الاول مجرد مصلحة لحد ما يصرفوا الفلوس بتاعت الشغل دي.
انا حزين جدا وزعلان من اخويا وزعلان عليه علشان خلى علاقتنا ببعض كده ومن بعدنا علاقة ولادنا ببعض الكام يوم اللي كلمت فيها ولاد اخويا لقيت فرق كبير اوي بينهم وبين ولادي في أسلوب التربية وطريقة الكلام اللي بيتكلموا بيها وبيقولوه... اللي يخليني فعلا زي ما اتقال كلام ابويا وامي زمان اني انا هاخاف من اختلاط ولادي بولاد اخويا.
انسى علاقتي بولاد اخويا لأنهم تحت تربية واحدة مش كويسة ولا محترمة ؟ وان اتصال بنته بيا ده كان مجرد مصلحة لحد ما يصرفوا الفلوس من الشغل ؟
بس واضح ان مراته زي ما قطعت اخويا عني هتقطع ولاده برضوا عني رغم ان علاقتي بيهم هتكون لمصلحتهم ولمستقبلهم وفي نفس الوقت اخاف على ولادي من اختلاطهم بيهم بسبب البيئة والتربية اللي ولاد اخويا موجودين فيها... وبكرر تاني كل ما اتصل ببنت اخويا مبتردش عليا وقررت فعلا اني مش هتصل بيها تاني.
