اتقدملي واحد، وكان عاوزني احط مكياج ونشغل اغاني في
الخطوبة وكدة، وانا مكنتش حابة ده، وهو الاول اعترض! بس لما كلمته بمنتهى الهدوء وده من الدين، احترم ده، بس العيب بقى في أهله! وهو قالي انا اقتنعت بكلامك بس بصراحة انا شاريكي وعاوز اعدي اي عقبات تبعدنا، وانا فهمته اني بردو شارياه ومستعدة اتنازل عن اي حاجة ممكن تبعدنا، إلا لو حاجه فيها دين، عشان ربنا يباركلنا في حياتنا.
واهلي يقولولي طب ما هي فلانة وفلانة وفلانة عملوا كذا وكذا وعادي عايشين حياتهم مبسوطين عادي، وغضب ربنا منزلش عليهم يعني، وانا لما اقولهم ما هي فلانة معملتش ده مبسوطين بردوا هي وجوزها يقولولي ملناش دعوة بحد، والموضوع وصل انه احتمال نلغي الخطوبة وكل واحد يروح لحاله.
هو مقتنع بكلامي، بس مش عارف يقنع أهله وعاملين مشاكل، وانا اهلي عاملين مشاكل معايا، وكل ما اقولهم مادام صاحب الشأن موافق خلاص يقولولي هو بياخدك على قد عقلك، لدرجة اني من كتر ما بقيت باحضر الافراح بتاعتهم عشان يخلوني اشوف ان ده من البهجة والفرحة، ويا بنتي الدين يسر مش عسر بقيت حاسة فعلا اني انا اللي غلط مش هما، وكذا مرة اقوله لو انت فعلا رافض ده ومش حابه قولي وانا والله مش هزعل، لازم تعمل الحاجه باقتناع عشان متحسش انك بتعمله غصب عنك، وتقولي اني عاوزه امشي كلامي عليك، او بعد كده تطلب مني حاجه غلط او حرام وارفض فتقولي ما انا تنازلت عشانك، وهو كان دايما رده انا مقدرش اوعدك اننا نكمل لان الموضوع كبر، بس صدقيني هافضل متمسك بيكي لحد آخر لحظة، لان ده عجبني فيكي.
وانا صليت صلاة استخارة كتير خايفة اقبل بده وملحقش أستغفر ربنا وأموت، ويفضل ذنب ملفوف حولين رقبتي وخايفة افضل متمسكة، بده ويطلع في الاخر افورة او تعقد اعمل ايه ؟!
