انا بنت عندي 25 سنة من طنطا بس عايشة في القاهرة، واتخرجت من جامعتي، انا اهلي ناس محترمة على الرغم ان فيه مشاكل بتحصل بينهم. بس ربونا كويس، انا زي اغلب البنات عندي فيسبوك وعليه اصدقاء بنات وشباب، ومتضايقه قوي بسبب كدة.انا الشباب دول والله معرفهم اصلا ولا عمري شوفتهم، بس بيكلموني في الخاص ويتعرفوا، وشوية شوية الكلام بيزيد وبيعرفوا كتير عني، وانا والله من جواية متضايقة، بكون عايزة امسحهم بس بقول: لأ دول كويسين مأذونيش في حاجة، وفي منهم كتير كان بيجيلي شغل ووظائف كتير، وبيحاولو يساعدوني، وفيه منهم كان شباب غريب يقعد بعد فترة من المراسلة يتدخل في امور حياتي ويبدا يغيّر الحديث انه هيكون حب وكدة وهيكون زواج، بس يشوفو صورة.. والموضوع بيخلص ان فعلا الكلام هينتهي لان انا حرام وغلط ان بنت تعمل كدة وتبعت صورها لحد متعرفوش.
وكل ما اكبر ضميري بيوجعني اكتر، انا وصلت للسن ده ولسة بتكلم مع ناس معرفهاش، مع ان بحفظ قرآن وعمري ما زاملت حد في الجامعة او حتى في المدرسة. بس انا دلوقتي بفكر لو في المستقبل وفي نفسي او يعني لو جالي عريس مثلا في يوم من الايام هقولوا ايه ولا اعمل اية وانا كنت مكلمة شباب قبله على الفيسبوك.
عايزة حد يقولي اعمل ايه؛ من غير اي اسلوب مش حلو في الكلام انا عايزة نصيحة ابدا ازاي انهي علاقتى بالناس اللي على الفيسبوك من غير ما احس اني اذيت حد، وفي نفس الوقت لا أؤذي نفسي. لان اعرف ان ممكن حد يتضايق من مجرد انه حد يمسحه، ساعدوني اني ابطل العادة السيئة دي واني اخلي اصدقائى على الانترنت بنات وبس.
