يا جماعه أنا حابه أحذركم من التعامل مع شركة اثاث المفروض إنها شركه كبيره وبتحترم العميل (اثاث مصر) ولكن هحكيلكم اللى حصل معايا علشان كل واحد يخلى باله وهو بيتعامل معاهم ده لو قبل إنه يتعامل معاهم أصلا بعد اللى هقوله.
كان ليهم فرع جديد هيفتح فى المعادى و خصومات ليس لها مثيل وووو وطبعا روحنا الافتتاح واتعاقدنا معاهم على ٤ غرف واتقالنا طبعا كل ما هتزود غرفه الخصم هيزيد وتمام ورجعنا جيت أنا تانى يوم اتصلت بفرع تانى ليهم لأن هناك ما كنش فيه اى وضوح فى الاسعار نهائي وبناء عليه اللى اتقالنا صدقناه اتصلت بفرع آخر وطلبت من السيلز أسعار الحاجه اللى اتعاقدت عليها وطبعا ما عرفتوش انى مضيت عقد معاهم ولا حاجه اتفاجىء إنه بيقولى الاسعار أقل باكتر من ١٠ الاف من اللى اتعاقدت عليها وده طبعا فرق كبير كلمتهم تانى ازاى يا جماعه الاسعار دى قالو أصل ما بعناش إمبارح ونزلنا السعر النهارده..
وده طبعا غير منطقى أبدا عموما نزلو لى الاسعار زى ما الاخ فى الفرع التانى قالى اللى هى أكيد لو روحتله الفرع كانت هتقل عن كده ولكن السفره قالو لا لانها لوحدها سعرها فرق من ١٨٠٠٠ إلى ٢٦٠٠٠ قالو دى هنزلك فيها الف بس ليه علشان إنت وأخد كراسي استانلس.. طيب ما هو قالى السعر كده لا هو شال الاستانلس ازاى يشيل حاجه من نفسه كده لا هو كده وطبعا اتصلت بالاخ التانى اكتشفت إنهم حفظوه الكلام وقالى نفس الجملتين ولما شديت معاه فى الكلام قالى ثوانى هعمل مكالمه وخد بنفس الاسعار وبعدها كلمنى قالى لا هو ده اللى عندنا ودى اسعارنا اللى هو لو مش عاجبك اخبط دماغك فى الحيط طبعا.
ومع ذلك للأسف صدقتهم وعملنا عقد تانى بأسعار تانيه فرقت ٦ آلاف تقريبا وقولنا ماشي اتفاجىء إن الشركه المحترمه بعدها بيومين منزلين أوضة السفره فى الافتتاح سعرها ب ٤٥٠٠٠ بدلا من ٦١٩٥٠ وأنا واخده التربيزه بس ب ٢٥٠٠٠ طب إزاى!! ؟ طيب ليه قالو لى سعر الاوضه ٦١ وما قالوش عليها خصم!! ؟ ما علينا خلينا نخلص منهم وناخد حاجتنا اتفاجىء كمان مره إنهم منزلين على صفحتهم بعدها باسبوعين سعرها ب ٣٥٠٠٠ بدلا من ٥٠الف طبعا شىء غير منطقى إنه يكون عليها نفس الخصم وسعرها يقل فى أقل من اسبوعين ١٠ الاف من سعرها الأساسي إذا ازاى بتقولو سعرها قبل الخصم مره ٦٢ ومره ٥٠.
وازى أنا واخده التربيزه بس ب ٢٥! اتصلت أقدم شكوى فيهم طبعا رد عليا حد محترم وقالى لا يا فندم العرض اللى على السفره مش بالمواصفات بتاعتك!! طب إزاى..
وبكل بساطه قالى العميل اللى هييجى ياخدها هنشيله منها ال استانلس فى الكراسي وهنقلل من عرض البوفيه وهنشيل حاجات من النيش ! طيب فين المصداقيه حضرتك فى التعامل مع العميل ؟ لا ما هو لما هييجى الفرع هنقوله ده !
طيب سعر الكرسي ال استانلس كام قالى ٧ آلاف فرق عن إنه خشب وليه أنا قالو لى ٣ آلاف بس ! لو أعرف إن سعر التربيزه هيفرق ١٤ الف أكيد كنت فكرت تانى ليه كل واحد فيكم بيقول سعر وكلام مختلف عن التانى ليه الشركه ملهاش سياسه محدده واسعار محدده ليه سايبه الموضوع شطاره واللى يفاصل آكتر طيب هنكلم حضرتك طبعا ولا حد كلمنى بعدها و اتصلت تانى وللأسف برضو هنكلم حضرتك ولا حد بيتكلم!
شكرا اثاث مصر حقيقة دى اول واخر مره ولو بأيدى هنصح اى حد اعرفه أو حتى معرفوش بعدم التعامل معاكم لعدم المصداقية وعدم احترام العملاء بتوعكم.
