يسأل (هـ.هـ)؛ بنتى كملت ٦ سنوات في اللغات وداخله إعدادي؛ وحابب انقلها لتجريبي أو تجريبي متميز؛ لأني ما بقتش قادر على مصروفات المدرسة بصراحة هيا واختها.
هل دا هيفرق معاها بعد التخرج، خصوصًا ان فيه أماكن عمل بتطلب خريجين مدارس لغات فقط، ولا ساعتها اللغات زي التجريبي مش هيبقى فيه فرق!؟الردمرحبًا أخي؛
هو طبعاً فيه فروق بين خريجي المدارس المختلفة سواء عربي أو لغات أو انترناشيونال؛ وتفرق مستوى المدرسة نفسها واسمها كمان؛ رغم ان اغلب الناس هتقولك متفرقش.
بس برضه الفيصل دايماً هي قدرتك انت وامكانياتك، يعني لو الناس قالتلك حتى اللغات مش كفاية لازم انترناشيونال؛ اكيد انت مش هتنقلها انترناشيونال طالما مش في مقدرتك.
مهم جداً انك تدخل أولادك مدارس مناسبة ليك مادياً وماتبقاش بتضغط على نفسك مادياً؛ لأن ده هيؤثر على أولادك نفسهم في مستوى حياتكم سواء في اساسيات أو حتى رفاهيات مهمة للأولاد يتمتعوا بيها.
المستقبل والشغل في الأخر
رزق؛ والله اعلم بيه. انما انت حالياً مهمتك توفر لأولادك أحسن حاجة حسب امكانياتك سواء تعليم أو حياة أو رفاهيات؛ ومتخليش التعليم لوحده يطغى على باقي حياتكم والمستقبل ده من عند ربنا سبحانه وتعالى.
طبعاً الكلام ده معتمد كمان على المدرسة اللي هتنقل لها انك تكون متأكد انها مش من المدارس اللي
الأطفال بيتبهدلوا فيها من حيث المعاملة، لأن للأسف الواحد بيسمع عن المدارس العامة (يمكن الحكومة العربي بالذات) ان المعاملة للاطفال سيئة سواء من المدرسين أو من الزملاء اللي من بيئات غير جيدة. لو البيئة داخل المدرسة نفسها سيئة يبقى لازم تحاول تشتري صحة بنتك النفسية وماتنقلش.
