تكتب (د.ا) أنا بكتب البوست ده النهارده للتحذير من شركة جديدة اسمها
إندرايفر InDriver ابتدت تنتشر في مصر كبديل لشركتي
أوبر وكريم؛ خاصة إنها أسعارها أقل. الشركة دي غير أمينة على الإطلاق على ركابها -حسب تجربتها وعلى حد أقوالها-، ابني ركب مع عربية من التطبيق يوم الخميس الماضي الساعة 10:02 مساءً من الرحاب، وبعد ما وصل وهو بيحاسب السواق، السواق خطف الموبايل من ايده وجري!
كنت فاكرة إن بما إننا بنستخدم تطبيق محترم يبقى المفروض عندهم كل البيانات وبيانات الرحلات متسجلة، بس اتضح إني غلطانة، الموبايل طبعًا اتقفل وأنا وقفت الشريحة فورًا وتاني يوم الصبح طلعت شريحة جديدة ودخلنا على حسابه علشان نجيب بيانات العربية ففوجئنا إن الحساب بتاعه اتلعب فيه، فاتمسحت بيانات الرحلة، وبقى بدالها رحلة تانية ملغية ببيانات عربية مختلفة.
إحنا عملنا محضر في القِسم ومحضر في مباحث التليفونات، وحاولنا نتواصل مع الشركة، فاكتشفنا إن ما لهمش أي أرقام خدمة عملاء؛ مجرد إيميل، وبعتنا عليه ومفيش أي رد من جانبهم وملهمش مقر معروف.
يعني الشركة سيئة جدًا، وكمان الحسابات ممكن تُخترق بسهولة، الحمد لله إن الموضوع اقتصر على سرقة الموبايل، بس لازم الكل يحذر من الشركة دي لأنه من الواضح إن مفيش أي رقابة ومفيش أي وسيلة تواصل لو حصلت مشكلة من أي نوع.
