(م.ا) يحكي لنا معاناته مع معلش محتاج رأي حضراتكم. أنا معاد جوازي قرّب، لكن مع ذلك مكتئب جدًا. في خلال السنين اللي فاتت كنت ادخرت مبلغ كويس، لكن والدي مرض أكتر من مرة ودخل المستشفى وعمل عملية. للآسف بسبب أننا أسرة حالها بسيط على قدنا..
أنا اضطريت أدفع أغلب مصاريف المستشفى والعملية؛ مقلتش حاجة لأهلي لأن أنا الولد الوحيد. عندي اختين واحدة فيهم مطلقة وببنت وبتصرف عليها فأي احتمال أنها تشارك كان معدوم، والاخت التانية كانت قربت تتجوز. المهم أني صرفت كل اللي حوشته على المستشفى واستدنت من صديق ليا.
دلوقتي معايا مبلغ بسيط جدا للجواز اللي قدرت اجمّعه بعد ما والدي عمل العملية. بس كل اللي فات انا عملته برضى ومن منطلق انه والدي ومينفعش ابخل عليه.
اكتشفت قريب ان اهلي ساعدوا أختي تشتري
شقة تمليك وادوها ٦٠ الف جنيه، وانا ناويين يدوني في جوازي ٥ آلاف جنيه بس (بالرغم ان اختي بعد ما اشترت الشقة لسه قاعدة معانا في البيت).
انا اتصدمت ومن ساعتها مكتئب وكل شوية بعيط. حاسس بالظلم لأني عمري ما طلبت منهم حاجة او قلتلهم ساعدوني اخد شقة او ساعدوني بأي صورة من الصور، بالعكس اغلب مرتبي بدفعه كمساعدة ليهم في البيت.
خايف اتهان قدام اهل خطيبتي. ومن ناحية تانية خطيبتي صعبانة عليا علشان مش ذنبها. مش عارف اعمل ايه..
انا مكسوف جدا اني بحكي حاجة زي دي بس والله مش قادر اكتم جوايا. أتمنى تقولولي على حلول أعملها..وشكرًا ليكم.
