انا متزوجة من تسع سنين وعندي ٣ أولاد. أعيش انا وزوجى ووالد زوجي والاولاد في بيت واحد.والد زوجى بيتدخل في كل شىء، وزوجى قاعد ليل ونهار مبيشتغلش، ووالده بياخد معاش، بيجيب لزوجى السجائر وهو نايم. ولو يوم ربنا رزقه وجاله شغل يقوله متطلعش، انت تعبان، احنا ميلزمناش شغل.
حصل مشاكل كتير، وطلعت، وحكيت لأهلى، بس للأسف لما زوجى يجيلى بيت أهلى والدى يقوله هى محكتليش حاجه، واتصالحوا، انا لا أتدخَّل؛ ولما انا اجى اتكلم وافهمه أنه مينفعش يقعد وانا اللى اشتغل واصرف على البيت والأولاد، يقولى حاضر، وهشتغل، ويسمع الكلام، ولما ارجع البيت يرجع للكسل تانى، وابوه مقويه على كده.
والمشكلة انى لما ارجع من شغلى واعمل غدا ميعجبش حمايا، برغم أنه بياخد مرتب ومش بيساعد معايا لانه شايف ابنه، وانى انا هطلع كل شويه غضبانه، لا بيجيبله سجايره ويديله مصاريف على قده، وجوزى مش بيدينى دلوقت.
انا تعبت وعملت عمليتين ورا بعض، اهلى دفعوا التكاليف، وكمان مصاريف
أولادي لأني قعدت من الشغل الفترة اللي كنت تعبانه فيها، ولما والد جوزي لقاني قعدت من الشغل وهيدبس في المصاريف قال أنا هقعد لوحدي وهشيل نفسي.
ولما رجعت شغلى من اربع شهور وبدأت ارتاح شويه من ضغط المصاريف عايز يرجع معانا بس برده من غير ما يساعدنى بحاجه أو حتى ميديش لابنه مصاريف وينصحه يشتغل عشان أولاده.
دلوقت انا عايزه ابقى في حالي، هو عنده خمس بنات ومتجوزين حواليه جنبنا يعنى، ومرتاحين ماديًا، وانا باجى من شغلي تعبانه ومضغوطة نفسيًا؛ هل انا غلطانه أو ملزمه انى اتحملهم، مش كفايه عليّ أولادي! ومنهم طفل مريض.
