يا جماعة؛ انا شاب عندي ٣١ سنة، وشغال مهنة بسيطة ولي اخت توأمي، وأمي وأبي انفصلوا من وانا عندي ٧ سنين وسابوني انا واختي مع جدي وجدتي ام ابويا.
وأمي مضت تنازل ان هي مالهاش عيال، بناء على طلب اخوها، والناس قالولها نرجعك؟ قالت: لا، اخويا قالي اطلقي عشان مش كان عايز يديها ورثها، وبعديها بفترة هي اتجوزت وابويا كمان اتجوز وخلف، ومحدش فيهم كان بيسأل علينا من ٢٨ سنة، لسه فاكرين يسألوا دلوقتي بعد ما اتجوزت انا واختي وجوز امي التاني مات وجدي وجدتي ماتوا وقاعد مع عمي، مع اني مأجر شقة برة متجوز فيها.
وامي دلوقتي من وقت ما انا اتجوزت وهي بتحاول تقرب مني وعايزة تيجي تقعد معايا وهي عارفة اني على قدي، حتى عايش مع عمي، وبادفع نسبة بسيطة للاكل وكده عشان مقدر ظروفي، وعمي وعمتي وقفو جنبي لما اتجوزت انا واختي، وشوفتلها شقة جمب مني وقولت ربنا يقدرني وادفعلها الايجار، وعمي وعمتي قالوا هنساعدك فيه.
أمي اخواتها مقعدينها في اوضة فوق السطح بدون حمام، وكل واحد ليه شقة تحت لما بتعوز تدخل الحمام تنزلهم تحت، واهم حاجة عندها اخواتها ميزعلوش وانا مش مهم عندها، وليها ورث عند اخواتها وبتقبض معاش كل شهر، وبسألها تقولي ماليش حاجة عندهم وهي معاها فلوس وبتقول مش معايا، حتى هي تعبت وعندها كورونا ومش عايزة تصرف وتروح للدكتور وعايزة تيجي تتعزل عندي في الشقة، بتقول عشان اخواتي خايفين ليتعدوا منها وهي خايفة عليهم وعايزة تيجي تقعد عندي ومراتي حامل ومناعتها ضعيفة، ولما بتتعب
مرات عمي هي اللي بتخدمها، وانا قاعد ليل نهار في بيت عمي.
