مشكلتي ان أخو زوجي يأتي بيتي وزوجي غير موجود؛ وهاحكي لكم التفاصيل. انا متجوزة بقالي ٥٠ يوم، هو باني بيت لوحده، وأمه قاعده معانا، وانا وافقت لأنها ست كبيرة وهو أصغر أخواته، وهي اللي ربته بعد ما أبوه مات.وف الـ ٥٠ يوم دول، أخوه الكبير جه عندنا مرتين في رمضان، ويقعد من الصبح ويفكر ويبات؛ مع العلم أن بيته مش بعيد عننا، وجه في
العيد قعد ٣ ايام، لحد ما جوزي نزل الشغل رابع يوم العيد.
من يومين بقا جه وجوزي في الشغل وقعد، وداخل طالع، وانا محبوسة في اوضتي ومش عارفه اتحرك، كلمت جوزي وقلتله، قالي: ايه المشكلة؟ ده زي أخوكي، وأمي عندك، فسكت.
لما رجع اتكلمت معاه، حسسني ان انا الغلطانه واني عاوزة افرق بينه وبين أخوه، ولما قلتله لو بعد الشر، انت جرالك حاجه؟ او اطلقنا هو من حقه يتجوزني! قالي ما نتي بتروحي عند أهلك وهم في بيت عيله وأولاد عمك كلهم هناك، مع العلم ان أولاد عمي دول انا متربية معاهم في بيت العيلة، فزعقت فيه وقلتله انت شفتني قاعده معاهم كذا مرة من واحنا مخطوبين، عمرك شفتني اتعديت حدودي؟ قالي: وانا عارف إيه بيحصل وانا مش موجود! قلتله: انت عارف انت بتقول كده لمين؟ انت فاكر نفسك واخد واحده من الشارع ! انا هروح عند اهلي وهم يردوا عليك.
وخرجت فعلا الساعة ١١ بالليل، وهو ضربني وخنقني بالطرحة، لحد ما كنت هاموت! فخربشته بالدبوس، ووقف في نص الشارع يقولي: طالما خرجتي من بيتي متدخليهوش تاني! فأنا دلوقتي رحت بيت اهلي ومش عارفه اعمل ايه؟
