مطلوب اقتراحاتكم لعمل - وظيفة - شغل لبنت سنها ١٤ سنة

[إنسان حر]

أُم تسأل: لو سمحتوا هو فيه شغل مناسب لبنوته ١٤ سنة عايزه تشغل وقتها في الصيف وتتحمل المسئولية شوية.

الرد

ممكن حضانة، تساعد في العناية بالاولاد الكبار شوية، والحضانات موجودة كتير فتسأل.

بقية الوقت بعد الظهر مثلا، تحاول تتعلم حاجة هاندميد لانها بقت تتباع غالية جدًا، أي منتجات بتتعمل بالايد: شنط كروشية او مكرمية او شغل خشب، بس ده تبدأ فيه وتستمر في التعلم، وممكن على الصيف الجاي او اللي بعده لو شدت حيلها تكون بدأت شغلها يكون كويس بحيث يتباع منه قطع، وتحط هدف يبقى عندها براند صغير كده و هكذا.

بس قبل ما تتوكلي على الله لازم تفهميها هي بتعمل كده ليه. و تحببيها في اللي هتعمله. و تخليها يقظة للعالم الخارجي و تشجعيها على باب نقاش مفتوح بينكم كل يوم بعد الشغل. تتناقشو في أي موقف دار معاها و تحكيلك اللي حصل و تقوليلها رأيك و تبقي مطمئنة انها هتحكيلك اي حاجة و انتي كمان تبقي مطمئنة انها هتشاركك كل شئ في التجربة المفيدة دي.

[مستشار]

ممكن أضيف؛


بصي أول حاجة لازم يكون الموضوع اختياري ليها وفي نفس الوقت تشوفه شيء أساسي ، الـ balance الغريب دا هيحصل بإيه؟ هيحصل بإن فكرك دا يكون مغروس جواها بكل جوانبه مش انتي بتنزليها الشغل دا ومن جواكي عارفة مدى سمو الفكرة لكن هي لأ ، فاهماني؟


الحاجة التانية: الشغل حاولي يكون في مكان لطيف مناسب لسنها ومناسب للعقليات اللي حواليها (عشان محدش دماغه على أده يجرحها وهي صغيرة مش بالقوة الكافية إنها تفكر بالمنطق ومتتجرحش او تاخد حقها)، عندي كام مقترح كده:

• حضانة مثلا.
• تكون assist لمدرس.
• لو بتعرف تكتب كويس ع الوورد، كويس فعلا وشاطرة إملائياً (عدت مرحلة الأخطاء الإملائية دي) ممكن تشتغل Data Entry سواء في مكتب أو Online (لو أونلاين هيكون فيه مساحة لإنها تـPerform أحسن عشان كمان ممكن تراجعي عليها).
• تاخد ورش (تريكو - كروشيه - أميجرومي ...)، وبعد ما تتمرس وتتمكن تقدر تعمل Page تشتغل من خلالها ودي هتكون Startup حلوة لبيزنس خاص بيها (بس محتاج صبر اوي).
• تركني نقطة الشغل، وتشوفي عمل تطوعي في جمعية معروفة وليها اسمها وثقة يعني ، هم بيدوهم تاسكات وشغل وما إلى ذلك متعلقة بالأعمال التطوعية وعلى أد سنها وهتكتسب Experience وقبلها قيم أخلاقية وإنسانية رهيبة.
• تبدأ كورس في لغة من الـZero وتكمل فيه بشكل Parallel مع الدراسة للاخر (هياخد كذا سنة عشان توصل لاخر Level) هتفرق جدا معاها قدام وبردو هتحقق الهدف المرجو (الاعتماد ع النفس وتحمل المسئولية): لإن هي هتكون عارفة إنها حاجة مش أساسية زي الدراسة لكن مكملة ومتحملة الصعوبة وزنقات امتحانات وسعي هي في غنى عنه ، وبردو هتفرق اوي اوي في مستقبلها قدام (مش شرط English ممكن Deutsch أو Japanese مثلا أي لغة ليها مستقبل وتحبها لإن اللغات مش كلها مقبولة نفسيا لكل الناس).
• تاخد كورسات ديزايننج و Illustrator وفوتوشوب وحاجات كده ، هتتبسط وبردو هتكون حاجة تفرق في الـ CV بتاعها في المستقبل وممكن تديها Step ناحية كارير معين.