سؤال مثل كيف أحمي نفسي من النصب والاحتيال يجب أن يكون في أذهان الكثيرين؛ كتير جدًا بشوف ناس كاتبين على السوشيال ميديا (معايا مليون جنيه وعايز أشغلهم)؛ تلاقي اللي كاتب "هاتهم وانا اشغلهملك"، واللي كاتبلك "خاص"، وهناك من يقول له "عندي ليك مشروع الفنكوش هيكسبك دهب".
يطلع ايه الفنكوش دا يا سيد؟ دا مشروع تسويق شبكي تدفع فلوس تشتري بيها بضاعة وتبيع وتجيب اتنين زيي يعملو نفس اللي انا عملته معاك وهتاخد عمولة على كل واحد تجيبه، بس يا سيدي بسيطة اهي.
واحد تاني يقولك تعالى اشغلهملك في الفوركس، دا طلع منه مليونيرات، وانت تقدر تبقى واحد منهم.
فكرة إقناع اللي قدامك بإنك تلعب على عاطفة حاجة اللي قدامك لعبة قذرة متفرقش، النصاب زيه زي الحرامي كدا.
لازم حرفيا تفكر في
مشروع تكون فيه خبرة، يعني بتاعك لوحدك مع دراسة المكان اللي هيتعمل فيه المشروع والايجار وكل ده. لازم يكون مشروع عليه طلب في الوقت الحالي. بدون ما تقع فريسة لعمليات النصب والاحتيال سواء على النت أو أرض الواقع.
نصائح كي تحمي نفسك من النصب والاحتيال
- نسبة كبيرة جدا من الناس نصابين والمستريحين كتير جدا اياك تثق في حد. مهما كان عيلته ولا ولا متثقش في حد.
- متديش فلوس لحد تحت بند تشغيل الاموال، ولو حتى كاتب ايصالات امانة لان الايصالات غالبا هتبلها وتشرب ميتها.
- لو لازم تديله فلوس يكون في وجود اهله.
- لو اديت لحد فلوس خلاص، وشميت وحسيت بمماطلة، حاول ترجع فلوسك بالطريقة او تزنقه، متستناش القضاء لانه هيكون هرب.
- مفيش أي ضامن نهائي ان اللي قدامك مش نصاب.
- جنيه في جيبك أبرك من ١٠ في ايد غيرك.
- لو هتكتب ايصالات امانة متسترخصش وروح لمحامي؛ ولو اني افضل متديش فلوسك لحد.
- اللي بيكتب ايصالات امانه غالبًا خبرة، ومتعود ونصاب. وبيبقي عارف بيعمل ايه.
