يسأل صديقنا؛ بأجر شقة اخر دور، والسمسار بيقولي ان السطح معموله عزل، بس انا مقدرش اتأكد من كلامه وطلعت السطح لقيته معمول سيراميك ابيض.
الشقة كويسة جدا، لكن انا قلقان اوي من موضوع اخر دور ده والحرارة.
حد يقدر يقولي ممكن اتاكد ازاي اذا كان السقف معزول ولا لا ؟ ولو معزول فعلا هتبقي زيها زي أي شقة عادية ولا بردو حرارة أعلى.
الردحضرتك بتحس بيها بمجرد الدخول، مرة دخلت غرفة غير معزولة ومعرضة للشمس طول اليوم؛ في ظرف دقيقة كنت بأشر عرق من كل حتة في جسمي ، وممكن لو عصرت التي شيرت ينزل مياه. لكن لو دخلت الشقة ولقتيها عادية زي
الشقق اللي في الأدوار السفلي، أو حر أكتر شوية صغيرين، تبقى معزولة.
وطبعا الحرارة هتكون أعلى من الشقق الأخرى، وعن تجربة بعض الناس، بلاش الاخير، ولو الواجهه طوب احمر مش متشطب بلاش. اما موضوع العزل تقدر تروح تتفرج على الشقة الساعة ٥ العصر، بشرط أن المالك ميكونش منتظرك ومفتح الشبابيك عشان تقدر تحكم على الحرارة وهي مقفولة.. ونصيحة ابعد عن الاخير وريح دماغك.
الدور الأخير والتكييف
وللعلم، العازل تحت السيراميك بيقلل نسبة من الحر، بس برضه هتفضل حر؛ وفى ايام لازم
تكييف -ايام الحر الشديد-.
لكن بردو الشقة اللي في آخر دور دي بيبقى فيها هواء تحفة لو الجو معقول، فيها فيو جميل، لو عالية قوي ما حدش يجرحك، لو فيه اسانسير توكل على الله وخدها، حاول تخلى العقد فترة قصيرة وبعدين تجدده.
في الوقت ذاته، اتأكد ان المايه كويسه مش ضعيفه ولا بتقطع كل شويه؛ واتأكد انها وقت الامطار الغزيرة تكون آمنه وميحصلش تسريب عليك. وكمان اعرف ان التكييفات في الشقق دى بتتعب وبتحتاج تكييف بقوة احصنة اكتر من المناسب لمساحتها؛ عشان تقدر تسد مع شده الحر. دى الحاجات اللى بسمع عنها مشاكل في الادوار الاخيرة وربنا يوفقك للصالح.
