صديقنا (م.م) يقول؛ انا كشاب، عاوز اسأل: ايه أسرع حاجة تجيب فلوس وتساهم في رفع مستوى معيشتي عشان أقدر أعيش حياة كريمة؛ خصوصًا ان انا شغال في التجارة وفاهم السوق، بس بأحاول اكون ايجابي، واقول اكيد فيه افكار؛ حد عنده افكار غير تقليدية وحاجات مربحة نقدر نعمل حاجة في وقت معقول، مش نقعد نفحت خمسين سنه عشان نعمل خمسين ألف جنيه؛ اللي هما اصلا ملهمش أي تلاتين لزمه.
الرداولاً: ركز في حاجة محددة، علشان تبقى واحدة واحدة كبير فى السوق اللي انت داخله.
ثانيًا: السوشيال ميديا بقت حاجة مرعبة ومهمة جدا؛ وممكن تساهم معاك أنك تلاقي فيها أسرع حاجة تجيب فلوس، اعمل صفحة كويسة لشغلك، لو جزء من
شغل الادوية مثلا له علاقة بفيتامينات او حاجات
للتخسيس او غيره، اعتقد الانستجرام او غيره هتفرق معاك جدا.
ثالثا: دايما تصدّق، حتى لو بمبلغ بسيط كل شهر، الصدقة حقيقي بتضاعف البركة فى رزقك وحياتك.
واخيرا حط خطط لنفسك ولما البيزنس يشد حيله شوية استعين بحد يساعدك فى التوسع (زيادة راس المال)، او حتى ادخل مجال تانى، لان واضح ان حضرتك بتحب كزا حاجة.
لو انت دارس؛ وبتطبق اللي درسته هتستفاد جدا بيه. اللي هو اداره الاعمال، لو انت مش دارس هتمشي عشوائي. لو ينفع تدرس ادرس او شوف حد متخصص في ريادة الاعمال خليه مستشار ليك. هتستفاد جدا.
استغفر كتير، يا رب يوسع رزقك ويرزقك من حيث لا تحتسب.
وخلي بالك من ملاحظات مهمة:
- راحة البال رزق.
- الصحة رزق.
- فيه حجات كتير اهم وأحسن وأفضل من التفكير في الفلوس.
- السلم بيطلع وحده وحده مش نط؛ وعلى قد سعيك ربنا يرزقك.
