(ا.ا) يسألنا؛ حد له تجربة مع الطائرة اللعبة اللي بالريموت، هل بتشتغل كويس وبتعيش ولا بتبوظ في اول اسبوع وتترمي. ولو فيه طياره لعبه بالريموت للأطفال والكبار كمان كويسة غيرها لحد بيحب الطائرات وتكون بتشتغل وتعيش كويس عن تجربة ياريت ترشيح ليها.
الردأولا؛ لازم تجربها، فيه منها أنواع كويسة وفيه أنواع صعب تتحكم فيها، وطيرانها مش حلو، وبتطخبط وتتكسر. بس نصيحتى هى كلعبة فاشلة. فيه ألعاب
ذكاء وممتعة للطفل وكمان بتعيش أكتر.
ثانيًا، النوع اللي في الصورة ده بيتكسر بسرعة للأسف، فيه أنواع تانيه انضف واحسن بس غالية؛ من ٦٠٠جنيه وانت طالع.
ثالثا: فيه ناس اشترت برده الطيارة اللعبة اللي بـ ١٠٠٠جنيه، واتكسرت من أول تجربة، لأنها بتطير وتتعلق فى حاجة وتقع مرة واحدة؛ وده في حال انك شغلتها في مكان ضيق، مش مفتوح (وغالبًا دي أهم ملحوظة).
رابعًا؛ فيه ناس من اللي جربوها قالوا انك مش هتعرف تتحكم فيها علشان ملهاش مروحة من الخلف.
خامسًا؛ فيه حاجات شبه درونات التصوير، بس من غير كاميرا طبعاً، أربع مراوح وريموت وتوجيه حقيقي، وممتعة جداً.. بس بتكون أغلى.
سادسًا؛ وبشكل قوي هذه النصيحة في منتهى الأهمية، مينفعش تشغلها جوة البيت لان هي حساسة لأي عفش. عايزة مكان واسع وفاضى؛ الاولاد يلعبوا بيها، مثلا
جنينة او فيلا أو حتى فى نادي.
سابعًا، وده شيء حزين، ان صديق لنا قال انها ولا تنفع حتى في مكان مفتوح، لأن اقل تيار هواء هيخلي التحكم فيها صعب؛ يا إما هتخبط في شجرة يا إما هتخرج برة مدى التحكم وتقع من على ارتفاع.
