يا جماعة انا أحتاج مقترحاتكم لأنجح مشروع في حدود 50000 جنيه؛ أنا سني ٤٠ سنه خريجة آداب قسم لغة عربية؛ اشتغلت شويه مدرسة وبعدين قعدت عشان الأولاد. دلوقتى نفسى يكون لي دخل خاص بيا ويجيب فلوس عشان اصرف على أولادي كويس؛ ياريت أفكاركم لعمل مشروع براس مال ٥٠ ألف جنيه.
الردبداية؛ المبلغ اللي معاكي مش كتير، أوعي تغامري بيه في
مشروع متكونيش دارساه او مستعدة ليه. انتي ممكن تستقطعي جزء صغير جداً نقول ٥ آلاف تبدأي بيه تجارة بسيطة ولما العجلة تدور معاكي وسعي شغلك. المهم حاجه تكون بتفهمي فيها وعلى قدك.
مشروع في حدود 50000 جنيه ممكن يتمثَّل في:
١. حضانة محترمة واعملي فيها كورسات يوسى ماث جولى فونيكس، تحفيظ قرآن بعد مواعيد الحضانة.
٢. ممكن تاخدي كورسات تعليم العربية لغير الناطقين بها و تدرّسي عربي أونلاين للأجانب وتقبضي بالدولار كمان؛ بس لازم يكون الانجليزي بتاعك حلو. او تدي دروس عربي للمنهج المصري أونلاين، أو تشتغلي مدرسة في مدرسة محترمة. بس خدي كورسات الأول تطوري من نفسك طالما كنتي قاعدة في البيت فترة. التعليم اتغير عن زمان و متطلباته اتغيرت.
٣. افتحي سنتر تعليمي.
٤. اشتري لاب توب كويس واشتغلى زووم تدرسى وتدي دروس وبس؛ متصرفيش الباقى.
