سنحكي لكم اليوم نتائج المستخدمين الذين قاموا بتلك العملية، ليقوموا بالرد على نقاش: تجربتي مع تكميم المعدة بالإيجاب والسلب.تجربة #١: مش هتعرفي تاكلي، هي دي السلبية الوحيدة، أول ٣ شهور صعبين، وبعد كده الدنيا بتبقى أحسن، لكن القدرة علي الأكل بتبتدي تزيد شويه بشويه، لكن برده كميات اكلك هتبقي ضعيفه جدا، لكن هتخسي طبعًا، وهتحسي بفرق كبير في صحتك وحياتك عموما.
تجربة #٢:
تجربتي مع تكميم المعدة ممتازة وزي الفل، الف حمد وشكر لله؛ تغير ١٨٠ درجة، من عامين ١٦٠ ك، الان ١٠٠. والأمور مستقرة بفضل من الله. لاكن لازم الإنسان يكون على نفسه رقيب وحكيم بعد العمليه في تنظيم الاكل.
تجربة #٣: أختنا تحكي، صديقتي كان وزنها زيادة جدًا، وكانت لا تستمتع بالحياة اطلاقا. ولا عارفه تروح ولاتيجى. فقد تخطت وزن ١١٠، ومش عاوزة اقولك ان حاليًا شكلها زي بتوع ثانوي. طبعا فرق معاها كتير فى حياتها، وفى نشاطها. ووجع ركبتها وظهرها اللى كان عندها من زياده الوزن. هى لم تلجأ للعمليه على طول. هى حاولت كتير فى ريجيم. وتخسيس بكل الطرق. بس للأسف مكنش بينفع معاها. إما انها تخس شويه وترجع تانى، او هى تزهق وتتعب نفسيا بطريقه وحشه بتؤثر على حياتها الأسرية نفسها. (يعنى) العملية مش هوب، اول اختيار... لا، هى حاولت وجربت وتعبت، ومعرفتش تخس. فلجأت فى الاخر للعمليه. وعملتها في يوم واحد، يعنى بتروح تعملها فى يوم وتطلع تانى يوم. بتفضل اول شهر تشرب سوائل فقط، مفيش اكل، والأدوات اللى بيتم استخدامها بتكون لمرة واحده. يعنى بتتفتح قدامها وبعد العملية يتم التخلص منها. الا بعض الادوات الأساسية. الحمدلله مرت عليها كويس قوى. وهى زى اى عملية، زى المرارة مثلا. فيه واحد يعملها وتمر عليه مرور الكرام ويقولك مفيش حاجه، وفيه يشتكى منها لفترة. العملية كما عرفت، هى تقليص المعدة بحيث بيكون حجمها اصغر، فبالتالى بتاكلى اقل بعد كده. بس ممكن مثلا تملأى الشويه الصغيرين دول بشيكولاته وبسبوسة وبكده يبقى سعرات اكتر رغم ان حجمهم اصغر. عشان كده، انا ارى ان
عملية تكميم المعدة مجرد اعطائك فرصة جديدة للحياة. يعنى مثلا، احنا بنقول يااااه لو نرجع زى زمان رفيعين، كان زماننا ارتدينا كذا وكذا وكنا حافظنا على نفسنا وجسمنا. اهوالعملية بتعمل كده، بترجعك تانى زى زمان، الباقى بعد كده بايدك انتى، معدتك صغرت، لكن هل ستملأي معدتك سعرات حرارية كتير قوى وحلويات؟ ولا هتعتبرى انها فرصه جديدة وبدايه جديدة وتاخدى بالك من نفسك؟
تجربة #٤:
عملية تكميم المعدة كويسه للتخسيس وظبط امراض كتيره زي السكر والكوليسترول والضغط؛ بس فيه ناس رجعت لانهم بياكلو حلويات كتيره وده غلط كبير.
تجربة #٥: انا عملتها، تأثيرها على الصحة العامة اختلافات فردية، يعنى ممكن حد يبقى كويس طول ماهو ماشى على الأدوية وتعليمات الدكتور، وحد تانى تعبان. لازم تروحى لدكتور الأول عشان يعرف حالتك الصحية عموما وهو يقرر ، ولو بتحبى الحلويات والبيبسى العملية هتفشل معاكى. هاتحسى بألم فى المعدة كل ماتيجى تأكلى فى أول كم شهر بس هتتعودى. هى حل لناس كتير فشل معاهم الربچيم العادي ودلوقتى بقوا ناس تانية خالص وأنا مش ندمانة أنى عملتها.
تجربة #٦: انا عملت قص المعدة وتصغيرها من حوالي كزا سنه، وخسيت حلو اوي في الاول، بس للاسف رجعت تاني زي الاول لان المعده رجعت لحجمها، ده غير الاثار الجانبيه، منها: الارتجاع، وده اكتر حاجه متعبه، واي كل مقلي متعب جدا، وعندي ناس قرايبي اضطروا يعملوها تاني علشان موضوع الارتجاع لانه بييجي كتير اثناء النوم، بس انا لسه لاني باضطر احيانا انام نص قعده. ويارب اكون قدرت افيدك، نصحتي: بلاش، خليكي في الريجيمات والرياضه.
تجربة #٧: عملية كويسة عن تجربة بعد ٥ سنوات. اهم حاجة
الدكتور، اعملي بحث كويس واعرف انت عايز تكميم ولا تحويل وطبعا الدكتور هيفيدك اكتر.
