المحرر موضوع: لو رايح زيارة للأهرامات.. هنا دليلك من أول الطريق لحد ما تخرج مع أهم النصائح  (زيارة 24 مرات)

جناح طاير

  • Full Member
  • ***
  • مشاركة: 187
    • مشاهدة الملف الشخصي
سؤال من (ع.م)؛ عايش بره مصر وفي اجازة، والاولاد عايزين يروحوا زيارة للأهرامات، وهروح بالعربية. نصايح اركن فين، واعمل ايه عشان اتمالك اعصابي واليوم ما يبوظش مني وانكد عليهم، هحاول اكون بالي طويل وصدري واسع! اي نصايح مُرحب بيها ماعادا اني ما اروحش.

الرد

مبدأيا كده حاول تكون هناك بدري قبل ما الشمس تسخن.

اوصل بالعربية لحد باب مينا هاوس وفيه كمين هناك هتعديه وتوريهم الرخص او البطايق ولحد هنا عادي.

تعدى الكمين بقي و تقفل ازازك واللي يشاورلك اوعى تقف له، بس اهم حاجة تبقي قافل ازاز العربية.

عديه واوعى تقف له لانه هيقف قدام العربية عشان يوقفك ويقولك البوابة مقفوله ولازم خيل وبتاع، المهم لما تيجي تعديه بسرعة هو هيلحق نفسه ويببعد ماتقلقش، عدي بقي الناس دي، هتوصل للبوابة، هتنزل الناس اللي معاك، يجيبوا تذكرة وحد يجيب لك انت كمان تذكرة وتذكرة للعربية.

تاخد تذكرتك وتذكرة العربية وتدخل من بوابة السيارات، وباقي اللي معاك هيدخل من بوابة الافراد، هتعدي، تستناهم جوه ويركبوا وتبدأ الزيارة.

أول حاجة الهرم الكبير اللي هو هرم خوفو، تخلصه، تاخد عربيتك وتطلع الهرم الثاني خفرع، تخلصه، تاخد عربيتك ثم الثالث منقرع، وبعد ماتخلصه هتكمل بعد الهرم الثالث هتلاقي مكان عالي اسمه بانوراما، وده مكان عالي شوية بتشوف منه الـ ٣ اهرامات مع بعض، تطلع بالعربية عشان تتصور الصور الحلوة وبعديها تاخد عربيتك وترجع عكس ما جيت، وتنزل على ابو الهول، هتلاقي بارك هناك برضه، تخلص ابو الهول وبعربيتك هتلاقي بوابة الخروج جنبك، تخرج منها وشكرا على كده.

ملحوظات بقي:
  • كل مكان هناك فيه بارك اتحرك بالعربية في كل الاماكن.
  • لو حابب تخش جوه الهرم شوف عايز تدخل انهي هرم وهات تذكرته من بره، مكان ما بتشتري تذاكر الدخول، لان جوه مافيش تذاكر.
  • ما تصدقش حد من الجمّالين اللي يقولك خلاص انا هدخلك جوه الهرم من غير تذكرة، لانه هيدخلك جوه هرم مجاني من الاهرامات الصغيرة.
  • لو هتركب جمل او حصان، اركب لما توصل البانوراما عشان الصور تطلع حلوة، لان كل اللي عند الاهرامات تحت مالوش لازمة.
  • اي حد يدايقك ماتعبرهوش وماتجادلش معاه، سيبه وامشي فقط هو ده الحل.
  • حاول تقرا عن الاهرامات قبل ماتروح، عشان ما تحسش انك بتشوف حجارة وخلاص.