كنت بحب واحده وهي كانت بتحبني؛ اتقدمتلها كتير قوي واهلها رافضين عشان مش عاجبهم شغلي اني ببيع فول رغم انى ظروفي كويسة.
لدرجة بعت كل الناس اللى قريبة من أبوها وامها برضو رفضوا، لغاية ما حسيت اني بقيت قليل قوي أو اني فعلا شغلي ده حاجه وحشة مع العلم (أبوها موظف عادي أخوها كل شوية في شغلانة يعني ناس بسيطة أحسن تفتكرو انهم من طبقة تانية).
المهم انا مستحملتش وخطبت وبرضو فضلت اكلم اللي بحبها واقولها حاولي تتكلمي مع اهلك بس هيا مكنتش قادرة عشان أبوها وامها صعبين وكنت بقولها هفركش وكنت بكلمها اكتر من خطيبتى مع العلم (اللى خطبتها أبوها تاجر كبير يعني مش حد على قده يعني شغلي مكنشى عيب).
وكنت بقولها اني مش هكمل وافركش بس كانت تحصل مشاكل واعند واكمل في خطوبتي لغاية ما اتجوزت ومراتي حملت من اول اسبوع.
وكلمته فترة بعد ما اتجوزت وجابت اللوم كله عليا واني مصبرتش والمفروض كنت صبرت وهيا الوحيدة اللى كانت تقولي متاخدش على كلامهم عشان كان كلامهم مأثر فيا جامد وانى شغلي مش عيب.
بس انا كنت وقتها تعبان بجد وهي دلوقتي خست خالص خالص وفي سنة الخطوبة لحد بعد الجواز كل مكالمة بينا كانت لازم تبكي ومن كتر البكى والزعل جالها كزا مرض بتتعالج منهم لحد دلوقتي انا بحبها لحد دلوقتي وبحبها قوي.
وبرضو بحب مراتي عشان بتحاول ترضيني بأي طريقة ومهما كانت تعبانه أو في عز نومها لو قولتلها على حاجة تقوم على طول وتكون فرحانه كمان.
انا ديما حاسس بالذنب من ناحية البت اللى سبتها كل ما بشوفها دلوقتي واشوف صورتها زمان بتصعب عليا قوي؛ ايه الحل؟
