صديقنا (م.م)؛ يحكي ويسأل في نفس الوقت مشكلته مع الخوف من قيادة السيارة، ويقول: لو سمحتو يا جماعه ساعدوني، انا اتعلمت السواقه في مدرسة ومشيت دائري وكده، وطرق تانيه، وما كنتش خايف عشان الكابتن كان كل حاجه هو الي بيقولي اعمل ايه.
وبعدين جبت عربية اوتوماتيك عشان مش بحب المانوال، وبقيت خايف جدا اني اسوقها؛ وفيه ناس هنا شجعتني وادوني شويه نصايح والحمد لله جمدت قلبي وبقيت امشي في طرق عاديه، وفي منطقتي.
بس انا فعلا خايف ومرعوب اني امشي دائري أو طرق سريعة، وخايف اخرب الدنيا وما اعرفش اتصرف واتوتر واتسبب في كارثه.
مع العلم اني شاري العربيه عشان مشاوير وسفر وكده، مش عارف اعمل ايه الصراحه انصحوني يا جماعه وقولولي تجاربكو مع الموضوع ده؛ وأعطوني نصائح: كيف أقود السيارة بدون خوف؟الردخد واحد صاحبك معاك شوية شوية لحد ما هتتعود، كنت زيك كدة بالظبط، اهم حاجة مرياتك وتدي مسافة بينك وبين اللي قدامك، ومتتوترش مهما حصل، انا اول ما طلعت الدائري طلعت بعربية مانيول، وكنت مرعوب؛ بس بعد كدة انت اللي هتختار الدائري من كتر الزحمة اللي هتشوفها.
اطمئن؛ وهقولك ليه، بالمنطق؛ أولا انك سايق اوتوماتيك ده يطمنك عشان انت ساعتها تركيزك مع الطريق هيكون أكثر من المانيوال لأن في المانيوال فيه جزء من التركيز بيكون مع فكرة انك تجيب الغيار المناسب للسرعة الحالية وكده.
لكن الاوتوماتيك هيخلي كامل تركيزك يكون مع الطريق اكتر وده هيزود الأمان.
تاني حاجة؛ ممكن تخلي خطوة انك تسوق على الدائري بالذات تتأجل شوية لحد ما تتعود على الطرق السريعة جوة المدينة اكتر شوية، وتعرف تركز مع استخدام الاشارات ومعانيها، ومع الثبات في الحارة وامتى تغير حارتك وكدة.
وأخيرا هقولك ان الخوف نوعين: خوف بيمنعنا من الحياة، وخوف بيخلينا نركز وناخد حذرنا واحتياطتنا.
ربنا يستر طريقك ويسهلك امورك كلها يارب إن شاء الله.
