انا مطلقة وعندي ٣ أولاد، واتظلمت جدًا مع زوجي، كان خاين وكداب واناني، وكان مسافر معظم وقته بعيد عني، وفي الاخر نزل واتجوز عليا وسابني، وحصلت مشاكل انتهت بالطلاق.
دلوقتي انا متقدملي
شاب محترم وابن ناس وعلى خلق وعازب وأصغر مني في العمر، فرق بسيط مش كتير، ومصمم انه يتجوزني رغم ظروفي (اني مطلقة ومعاها ٣ أطفال) ومصمم جدا عليا.
المشكله اني خايفه على أولادي أن طليقي ياخدهم مني بعد الجواز، وانا ما اقدرش ابعد عن أولادي، وفي نفس الوقت نفسي اعيش حياتي واتبسط زي اي واحده في الدنيا، ودي ابسط حقوقي وخصوصًا اني اتظلمت كتير قبل كده.
ومن ناحيه الشخص ده، أهلي سألوا عليه طبعا كويس جدًا لأن اهلي نفسهم مكانوش مصدقين ان ممكن شخص عازب وفيه كل الصفات اللي تتمناها اي بنت ويصمم على واحده مطلقه ومعاها أطفال؛ محتاجة رأيكم ونصايحكم انا محتاره وبين نارين.
